Pagkapulpol gyud

Kun madayon man gyud nga suspensuhon sila si Ermita Barangay Kapitan Felicisimo “Imok” Rupinta ug ang pito niya ka konsehal, unta hulipan sila og mga tinudlo nga opisyal, nga may kaisog gyud sa pagpuo sa mga ilegal nga kalihukan diha sa maong dapit.

Wala gyud makasanta ang mga opisyal sa Ermita, apil ang mga tanod, sa pagkuyanap sa pagpamaligya og shabu ingon man sa daghang video karera, moli-moli ug illegal swertres.

Bisan og walay ebidensiya nga magpakita nga sila nagdawatan og payola gikan sa mga tigpasiugda niining maong mga ilegal nga kalihukan, apan masabot kaayo nga ingon niini ang nahitabo.

Ang pangutana nako ngadto ni Kapitan Rupinta, nganong wala man gyud ninyo mapuo kining mga ilegal nga kalihukan sa inyong barangay? Ayaw ko’g ingna nga wala sila masayod nga daghang pushers nga nag-operate sa ilang barangay?

Ayaw ko’g ingna nga wala sila mahibalo nga mikatap na pag-ayo ang mga video karera ug moli-moli diha sa Ermita Proper, ilabi na sa Sitio Bato? Utro pa kining mga polis sa Carbon nga walay nahimo bisan og ang Sitio Bato anaa ra sa likud sa ilang police station.

Kinsa ba ang hepe sa Carbon Police Station karon? Kapulpol gud ninyo diha nga wala gyud mo makasakmit nianang mga video karera ug moli-moli. Ang akong inpormer miingon nga ang mga gambling machines diha adunay logo nga RJ ug LT.

Diha sa Barangay Suba ug Pasil, ang akong inpormer miingon sab nga ang mga video karera nga midagsang sa maong mga barangay adunay mga sticker nga “S” nga susama og porma sa Superman, JK ug uban pa, nga matud pa gipanag-iya og opisyal sa barangay.

Atensyon Mayor Tomas Osmeña, pakampanyahi na kini pag-ayo. Naghatag lang sila og kauwawan sa imong administrasyon, ilabi na nga akong nahibaw-an nga ang pipila ka operators, mga opisyal sa barangay nga dili imong supporters.

* * *

Gipanglabay og bato ang mga garbage truck nga naghakot sa basura sa dakbayan sa Sugbo paingon sa landfill sa Aloguinsan. Ang uban sa mga garbage truck gipangdakop sa mga environmental officers sa lungsod sa Carcar.

Natural ang reaksyon sa mga tawo nga masuko gyud kay puwerteng bahoa sa mga basura nga mag-agos ang duga niini nga mahabilin diha sa karsada. Bisan na man tingali og ako pa ang natumngan, masuko gyud.

Ang maayong buhaton sa Jomara Kunstruct Corporation nga maoy naghakot sa mga basura sa dakbayan sa Sugbo, butangi ninyo og kemikal ang mga basura aron mopamenos sa baho.