Pangandam sa katalagman

Bisan og low pressure area, kon LPA lang ang atong nasinati niining nakalabay nga mga adlaw, apan nakamugna kini og kadaot. Sa dakbayan sa Sugbo lang, daghan nga residente ang naapektohan didto sa Barangay Sirao diin dunay pagdahili sa yuta.

Kadaghanan sa mga dapit sa lalawigan sa Sugbo nakasinati og pagbaha nga nagbutang sa peligro sa kinabuhi sa mga tawo. Didto sa Mindanao, partikular sa Cagayan de Oro City, nakugang ang mga tawo sa kalit nga pagsaka sa tubig.

Nasusama sa dagat ang palibot kay ang mga sakyanan nanglutaw na gani sa kalawom sa baha. Kompiyansa sila nga normal na ang epekto sa pagsige og ulan mao nga ang uban nanglakaw og ang mga tunghaan nagpahigayon sa klase tungod kay wala man lagi bagyo.

Ingon usab niini ang kasagaran nga hunahuna sa atong kaigsonan dinhi sa Sugbo. Gani didto lang sa Barangay Paknaan, Mandaue City niadtong nakalabay nga semana, gikinahanglan pa nga tukhangon sa mga sakop sa Disaster Risk Reduction and Management Office ang mga residente daplin sa Butuanon River aron mohiklin kay gibaliwala man sa mga tawo ang peligro.

Ang atong mga opisyal igmat na ug modeklarar dayon og pagsuspenso sa klase kun dili na maayo ang panahon aron dili mabutang sa kakuyaw ang mga estudyante. Apan isip usa ka ginikanan, ako dili na maghulat sa deklarasyon sa gobiyerno, otomatik na ko nga modisisyon nga dili paeskuwelahon ang akong anak. Ingon lang niini ka simple.

Sige na nako kini nga gihimo, ug dinhi sa akong lindog usbon nako pag-awhag ang publiko nga dili nato isalig ang atong kaluwasan sa kamot sa mga opisyal sa kagamhanan, kun dili, kita mismo ang kapitan sa atong kinabuhi nga motimon ngadto sa dunggoan sa kaluwasan. Duha ka PP, ug dugangan pa ug dako nga P ang formula sa atong safety. Pagpangandam, Pag-amping ug labaw sa tanan Pag-ampo!