EDITORYAL - Naanad na lang

Naanad na lang gyud ang kapolisan nga tungod kay pakyas man sila pagsiguro nga mabantayan nila nga dili makahimo og pagpanggubot ang mga terorista, moderitso na lang sila pagsugyot nga pagngon ang signal sa mga cellphone.

Nahutdan na og maayong paagi ang kapolisan kun unsaon nga masiguro nila nga dili makahimo og mga pagpamomba ang mga terorista atol sa pagpahigayon sa Miss Universe Swimsuit Competition diha sa dakbayan sa Lapu-Lapu.

Giangkon sa kapolisan nga kun dili pagngon ang signal sa mga cellphone, dili gayud sila makapaniguro nga mapugngan nila kun ang mga terorista mohimo og pagpanggubot pinaagi sa pagpabuto og bomba gamit ang cellphone.

Kagahapon ug karong adlawa, daghang nasakripisyo human nga giaprobahan sa National Telecommunications Commission (NTC) ang sugyot ni Central Visayas Police director Noli Taliño nga pagngon ang mga cellsites nga naghatag og signal sa mga cellphone sa dakbayan sa Lapu-Lapu.

Sa paghimo nila niini, dili kay ang taga dakbayan sa Lapu-Lapu lang ang nasakripisyo, kun dili, apil ang mga cellphone subscribers dinhi sa dakbayan sa Sugbo, Mandaue, Consolacion, Cordova ug apil na gani sa pipila ka dapit sa Bohol. Usa ka opisyal sa telecommunications network mipasabot nga aron pagsiguro nga walay signal sa cellphone nga molusot didto sa dapit nga gihimoan sa kompetisyon, pagngon gayud ang mga cell sites nga ania sa Sugbo nga makaabot ang signal sa Lapu-Lapu.

Kini maoy hinungdan nga ang mga cellphone subscribers dinhi sa dakbayan sa Sugbo nagbagulbol kay walay signal ang ilang mga kahimanan sa komunikasyon. Bisan gani ang taga Bohol, apektado usab kay ang cell sites nila nga makaabot ang signal sa Lapu-Lapu giapil man usab sa pagpawong.

Sa kadaghan sa mga intelligence community sa kapolisan ug militar, dili gayud sila makabantay kun may mga terorista nga makasulod dinhi sa ato? Kun walay signal ang mga cell phones, dili kaha nga lakip ang mga tinugyanan sa balaod apektado sa ilang mga gimbuhaton? Angay nga si General Taliño ug ubang opisyal mangita’g maayong paagi nga dili kay ang pagpawong sa cell sites maoy madali nila nga himoon.