Nindot na kaayo ang bag-ong barangay building sa Guadalupe. Salamat ni Kongresista Bebot Abellanosa, apan dunay nakabalda sa atong panan-aw --ang karaang structure atubangan niini, wala na unta gamita.
Atong nasayran nga dili kuno mosugot ang Commission on Audit nga gub-on ang maong structure, sa walay klarong hinungdan. Unsa may labot sa COA niini? Duna ba sila’y nakita nga anomaliya, mga kahiwian ug disallowances? O mahisupak ba sa ilang mga rules and regulations kun gub-on ang maong structure?
Gawas nga eyesore, nakabalda usab kini sa trapiko tungod kay anha man mo-park ang mga sakyanan sa sidewalk ug ang pedestrian sa daplin na sa dalan moagi. Busa, eyesore na, traffic hazard pa gyud.
* * *
PDP-Laban to spearhead shift to federalism – headline ang pamahayag ni PDP-Laban Deputy Secretary General Raul Lambino. Gipaabot nga itudlo ni Presidente Digong Duterte ang 25 ka sakop sa panel nga mo-review sa 1987 Constitution.
Sumala pa, ang Kongreso maoy mo-convene paghimo’g kausaban sa konstitusyon, pag-shift ngadto na sa federal system of government nga maoy tinguha ni Duterte, diin matud niya, ubos sa bag-ong sistema sa panggobiyerno, andam siyang moluwat sa katungdanan, bisa’g sa dili pa matapos ang iyang termino, aron makapili na kita og bag-ong presidente.
Ang Presidential Management Staff maoy mahimong secretariat niining komite nga ugmaron, to provide technical, administrative ug staff support. Atong makita dinhi nga serious ang Duterte administration nga mapahigayon gayud ang federal form of government dinhi sa atong nasud.
Dapat na lang. Sumala sa atong nasinati, ang sistema sa panggobiyerno karon, conducive kaayo sa kurapsyon ug walay nahimong kaayohan, pulos problema ang nahiaguman sa katawhan. Pipila lang ang nahayahay sa pagkabutang, nagpahimulos sa bahandi sa nasud, apan, ang labing daghang molupyo nag-ilaid sa tumang kalisud, gidumala ug gidaugdaog sa Imperial Manila.
Akong tan-aw, usa sa nakapadaog ni Duterte mao kining isyu sa federalism. Kabubut-on kini sa katawhan nga mag-federal na kita.
* * *
Ang US embassy nanghimakak nga ang America adunay mga lihok pagpalagpot ni Presidente Duterte gikan sa katungdanan. Personally, dili ko motuo nga there’s such a move, nga kun duna man, bisa’g si kinsa pa ang magpasiugda, dili, ug dili gayud molampos.
Solid ang support sa katawhan sa administrasyon ni Duterte ug walay igong kapasikaran pagpalagpot kaniya, nga kun duna man, ang naglaraw niini, nagpaghot lang sa buwan nga bisan unsaon nila’g paghot, igo lang sila nga ngisihan sa buwan.