Human sa taas nga listahan sa mga bulilyaso sa nangaging mga tagdumala sa Land Transportation Office (LTO) ug sa mas taas nga pagpinaabot sa mga motorista, gipamatud-an sa bag-ong liderato sa Department of Transportation (DOTr) nga mas takus sila sa pagsulbad sa nagbuntaog nga suliran sa driver’s license cards nga ilang nasunod.
Mapasanginlan nimo bisan unsa ang pamunoan ni Presidente Rodrigo Duterte, gikan sa pagpanlaktod sa kampanya batok sa ilegal nga drugas ngadto sa pagbinastos sa kababayen-an ug mga lider sa ubang kanasuran ug kalibutanong mga institusyon, apan dili sila matulisok sa kaluya ug kalangayan. Labi na si Transportation Secretary Arthur Tugade.
* * *
Nipahibawo si Direktor Alita Pulga sa LTO Central Visayas nga nagbaguod sila nga nagdala sa 100,000 ka plastic sa driver’s license cards gikan sa ulohang buhatan niadtong Huwebes sa gabii. Bisan sa kaapike sa panahon, nakasugod gyud sa pagprinta og pag-apud-apod sa mga lisensiya sa wa pa magsugod ang taas nga bakasyon sa Pasko.
Nipasalig si Pulga nga makabuylo na sila sa pag-apud-apod sa driver’s license cards unya sa Martes, Disyembre 27, sa dili pa magsugod ang mas taas nga bakasyon sa Bag-ong Tuig sa Disyembre 30. Gitakdang moabot sab sunod buwan ang balanse nga 111,197 ka plastic sa mga lisensiya.
* * *
Kay maghuot man gyud ang 211,197 ka drayber nga ni-apply og renewal sa lisensiya gikan sa Agosto 2015 hangtod sa Oktubre ning tuiga, nitanyag si Pulga og upat ka paagi sa pagpaprinta sa mga lisensiya:
Mahimong ihagbong ang photocopy sa official receipt (nga ang luyo suwatan sa contact number sa aplikante) sa drop-boxes nga ipahimutang sa mga buhatan sa LTO ug sa SM City Cebu, SM Seaside, SM Consolacion ug SM Lapu-Lapu City; o
I-email ang scanned copy sa OR uban ang contact number sa lto7actioncenter@gmail.com; o
I-fax ang OR uban ang contact number sa 2562745 o 2661304; o
I-text ang ngalan, license number ug contact number sa 09188073502.
* * *
Gipasalig ni Pulga sa Arangkada sa DYAB Abante Pa, Bisaya! nga human nila maprinta ang mga lisensiya sulod lang sa duha ngadto sa tulo ka adlaw pahibaw-on dayon ang mga aplikante nga mahimo na nila nga kuhaon ang driver’s license cards sa mga kiyosko nga ilang ipahimutang sa mga buhatan sa LTO ug sa SM City outlets sa Metro Cebu.
Mao nga makatabang sa tanang hingtungdan— dili ka masaag sa pagkuha ug dili mapul-an og tag-an-tag-an ang taga LTO asa nimo kuhaa ang lisensiya--kun ibutang daan sa imong email, fax, o text asa ang kinadul-an nimo nga buhatan sa LTO o kiyosko sa SM City Cebu, o SM Seaside City, o SM Consolacion, o SM Lapu-Lapu City. (leo_lastimosa@abs-cbn.com)