Ang ordinansa sa lalawigan numero 93-1 napasar niadto pang 1993, ug sa niagi pa nga petsa 7 nga napirmahan ang Memorandum of Agreement (MOA) nila ni Mayor Tommy Osmeña ug Governor Junjun Davide. Kasabutan nga magbayloay og luna ang dakbayan ug lalawigan sa Sugbo.
Kapin sa 5 mil ka beneficiaries ang mabulahan niini gikan sa 11 ka barangay nga naglakip sa Kamputhaw, Capitol Site, Kalunasan, Busay, Luz, Lahug, Mabolo, Apas, Lorega-San Miguel, Kasambagan ug Tejero.
Of course, dili pa mapaimplementar ang MOA tungod kay ang mayor ug ang gobernador kinahanglan pa og pagtugot gikan sa mga konseho sa dakbayan ug lalawigan nga sila makapirma sa gihisgutang MOA.
Sa ato pa, i-deliberate pa kini sa tagsatagsa nila ka konseho. On the part sa lalawigan, maora’g walay problema si Davide, apan sa dakbayan, adunay mga pagduda ug kabalaka nga dili mosugot ang mga konsehal ni kanhi mayor Mike Rama nga si Osmeña maoy kautangan og buot sa mga molupyo sa nahisgutang mga barangay.
Whatever, maghuwat lang ta kun unsa ang aksyon unya sa mayoriya sa konseho sa dakbayan. In fairness, hinoon, I don’t think nga ipatigbabaw nila ang politika over sa kaayohan sa katawhan.
Hinoon, nalipay kita sa pamahayag ni Vice Mayor Edgar Labella nga bukas ang iyang panghunahuna bahin niini. Sa napatik sa The Freeman, si Labella nagkanayon: “I will be open-minded and very objective about it. I cannot pre-empt what the Council would take, but of course, I will admonish the other members of the Council to be objective and open-minded…think about what’s the best for the people of Cebu.”
Nindot kaayo. Sa ako na nga gibalikbalik dinhi, ang agalon sa mga elected officials, dili ang partido, dili ang politikanhon nilang amo, kun dili ang lungsod, ang katawhan. Makaayo ba sa lungsod ang napirmahan nga MOA?
Ihiklin una ang politika, kini ang angayan tukion sa mga sakop sa konseho sa dakbayan ug lalawigan.
* * *
Aniay ma-imagine nato nga eksena kun idayon ang pagpang-apud-apod og mga condom sa mga tunghaan: Usa ka first year high school nga estudyante, moduaw sa school clinic, ug:
“Ma’am, hatagi ra ko’g condom kay duna ko’y date karong gabii.” Of course, dili mangutana si Ma’am kun unsaon ang condom. Unsa man, kun ikaw si Ma’am, imo siyang hatagan sa condom?
Imo ba siya nga maymayan o kasab-an? O imo siya nga tudloan unsaon paggamit ang condom aron moepekto. Makasulbad ba kini sa HIV?