Nisukol?

Nakalitan, apan sama sa wala na ikatingala sa kadaghanan nga nakahibaw sa kamatayon ni Albuera, Leyte mayor Rolando Espinosa Sr. Napatay sa mga sakop sa Criminal Investigation Detection Group kon CIDG sa Eastern Visayas nga gipangulohan ni Chief Inspector Leo Lagara, ang mayor sulod sa iyang selda sa Leyte Pronvincial Jail kadlawon sa Sabado.

Giingong nisuway sa pagsukol ang mayor kauban sa laing binilanggo nga si Raul Yap pinaagi sa pagpabuto og armas ngadto sa mga polis nga ni-serve sa search warrant sa giingong mga armas nga gipalusot sulod sa iyang selda. Ang Leyte Provincial Jail naa mahimutang sa Baybay City. Si Senador Panfilo Lacson moawhag ni Senador Richard Gordon, Chairman sa Senate Committee on Justice and Human Rights nga buksan pagbalik ang imbestigasyon sa extrajudicial killing nunot sa kamatayon ni Mayor Espinosa.

Pipila sa mga puntos nga buot maestablisar ni Lacson sa kamatayon ni mayor Espinosa: nganong dili sheriff ang ni-serve sa search warrant nga unta gisulod na sa selda ang mayor, o ang jail warden ang nipahigayon ini? Nganong ang CIDG mismo ang nisulod sa selda? 

Alang ni Lacson ang kamatayon ni Espinosa usa ka tataw nga extrajudicial killing. Imposible alang niya nga  mosukol si mayor Espinosa sulod sa selda. Wala na usay makasulti kun tinuod ang pamahayag sa mga polis nga nisukol ang mayor tungod kay ang kauban niya sa selda napatay man usab.

Menos ang mga detalye nga gihatag sa kapolisan sa mga sirkumstansya sa giingong pagsukol sa mayor.  Apan naluwatan ang search warrant tungod sa report nga nadawat sa kapolisan nga nipalusot og mga armas sa selda ang mayor.

Sa mga moimbestigar kun aduna man, hinaot nga matarong sa pagsusi ug usisahon ang tanang anggulo sa mga sirkumstansya sa giingong pagsukol nga nisangpot sa kamatayon sa mayor. 

Hinaut nga dili malaktod ang balaod ug dunay gawasnong institusyon o grupo nga mosusi sa maong insidente. Bisan kun gipasanginlan ang mayor nga usa ka drug lord kauban sa iyang anak nga si Kerwin Espinosa nga kasamtangang gibilanggo ron didto sa United Arab Emirates, nagbase pa gihapon kita sa atong pamalaod dinhi sa Pilipinas sa due process.

Nga mahatagan sa kahigayonan ang usa ka akusado nga makapanalipod sa iyang kaugalingon ug pamatud-an nga inosente siya sa salaod nga gipasangil batok kaniya. Alang ni Lacson dili maayo ang pagkasuwat sa script kun sa pelikula pa ang gidangatan ni mayor Espinosa.  Kun dili matarong sa mga polis pagpasabot ang kamatayon ni Espinosa mahimong makaapektar kini sa kampanya batok sa drugas nga gihingusgan sa administrasyong Duterte.

Kinsa pa man ang gustong motahan sa ilang kaugalingon kun wala na silay pagsalig sa mga polis o sa bisan unsang law enforcement agencies sa gobiyerno? Kahinumduman nagpanghadlok na sa iyang seguridad ug kinabuhi ang kanhi mayor tungod sa kadaghan sa tawo nga maligsan sa iyang pag-angkon ug pagtudlo sa iyang anak sa negosyo sa drugas.