Ingon niini ang sitwasyon sa upat ka mga sitio sa barangay Basak dakbayan sa Lapu-Lapu gumikan sa nasinati nga ulan sukad pa sa nakalabay nga semana nga nakamugna og pagbaha.
Mokabat sa 1,500 households ang naapektahan sa baha sa naasoy’ng barangay. Kalbaryo kaayo alang sa mga lumolupyo ang ilang sitwasyon gumikan kay misulod na mismo sa ilang mga pinuy-anan ang tubig.
Dihang misuot ako sa kabalayan nakita nako ang miserable nga kahimtang sa mga tawo. Tungod kay taudtaod na nga wala mohubas ang tubig grabe na kaayo ang baho diin nasagol na sa tubig ang hugaw gikan sa ilang mga septic tank.
Halos tanan mga residente gipangagod na ang tiil ilabi na kadtong walay mga botas. Mas luoy ang mga bata nga estudyante kay mosakay na lang sa styrofoam nga gihimong bangka aron dili moubog sa baha.
Labaw sa tanan delikado kaayo ang nagpundo nga tubig nga himuong breeding place sa mga lamok nga nagdala og dengue.
Dihang nasayran ni Mayor Paz Radaza ang problema gipatawag dayon niya ang kapitan sa Basak ug ang city engineer aron mahatagan og dinalian nga sulbad ang problema.
Ang immediate solusyon mao ang pagpalit og mga dagkong water pumps nga mosuyop sa tubig hangtud mohubas.
Labaw sa tanan aduna nay hayag nga pagkab-ot sa long term solution sa problema human misugot ang pribadong establisemento nga mabuslotan ang kural aron makaagi ang tubig padung sa sapa.
Gitagalan sila sa mayor nga mahuman kini sulod niining bulana.
Ang mga barangay official ang nakakita sa sitwasyon sa ilang mga molupyo ug dili na unta maghulat pa nga ipatawag sa mayor ayha molihok, sila na mismo ang unang moduol ug mangayo og ayuda kundili na kaya ang problema.
Kung napaabot kini dayon sa city hall hayan sulbad na ang naasoy’ng problema.