Si Senador Sony Angara mihangyo sa Duterte administration nga kun mahimo dili unta idayon ang laraw paglibkas sa value added tax (VAT) exemptions gikan kanatong mga senior citizen ug PWDs. Sa ato pa, i-lift na ang maong exemptions, ug pahamtangan na kita ning maong buluhisan. Ang mahibilin, mao na lang ang 20% nga diskwento.
Ang mga maayong laki gud sa atong gobiyerno karon, naglaraw man pagpaus-os income tax, ug kabahin sa salapi nga itapak unya pagkibra sa revenue sa nasudnong panudlanan, anha kuhaa pag-lift unya sa VAT exemptions gikan kanato.
Kun wagtangon na kining maong exemptions, giingon nga maka-generate ang gobiyerno gikan sa P3 billion ngadto sa P6 billion gikan sa mga seniors ug laing P1 billion gikan sa mga PWDs.
Nindot paminawon. Makapaus-os na kita sa income tax at the expense of the senior citizens and PWDs. Pastilan! Sa ato pa, ang kaayohan ug prebilihiyo nga gihatag nganhi kanato sa gobiyerno, ilang bawion.
Sama kini sa ilang solusyon pagsulbad sa trapiko sa Manila ug ubang dagku nga dakbayan sa nasud, nga mao ang pagpasaka sa buhis niini, aron gamay na lang ang maka-afford pagpalit.
Pastilan, nagpasayon lang gyud sila. Ako pa nila i-ban na lang gyud ang tanang sakyanan sa kadalanan. Siyaro’g matrapik lang gihapon.
Wa ba sila mahibawo nga ang nag-unang damgo sa yanong Pilipino mao nga makaangkon og sakyanan … bisag motorsiklo lang, o multicab. Ini’g kamahal na sa maong mga sakyanan sa kadalanan, atong gihikawan ang mga average earner nga Pinoy pagpanag-iya niini.
Ug dili nato kapugngan ang mga adunahan pagpamalit og dugang mga sakyanan, bisa’g unsa kini ka mahal.
Anyway, ila ning bright nga ideya. Sama sa pag-lift sa VAT exemptions gikan kanato, sa walay paghunahuna sa mga repercussions unya niini ngadto sa 7.5 milyones ka senior citizens sa tibuok nasud.
Matud nila, giabusahan kuno kini sa mga senior citizen, ug ang nagpahimulos pag-ayo ning maong prebilihiyo mao ang mga adunahan. Mga 750 mil ka senior citizens mga adunahan. Ug dili na unta sila magkinahanglan ning maong prebilihiyo.
Dugang niini, giabusahan kuno ang mga ID cards sa mga senior. Bisag kinsa lang kuno ang moimprinta niini, ug walay kontrol ang gobiyerno. Di baya ni tinuod. Hain na man kuno ang prinsipyo sa compassion, nangutana si Senador Angara. Matud niya, wala malakip sa miaging kampanya ang paglibkas ning maong benepisyo gikan sa mga senior citizen ug PWDs.