Napalaw intawon ang mga tawo nga miuna-una og duaw sa municipal cemetery ug sa tupad niini nga protestant cementery sa Barangay Gun-ob, dakbayan sa Lapu-Lapu atol sa besperas sa adlaw sa mga minatay.
Kini gumikan kay naglunang man sa baha ang naasoy nga mga sam-ang human sa kusog nga ulan niadtong nakalabay nga weekend. Ang mga tawo kutob lang gyud tawon sa ganghaan sa sam-ang.
Gani ang uban misuhol na lang sa mga bata aron ihatod ang mga dalang bulak ibabaw sa nitso. Ang uban miuli ug nagkuha’g butas aron makataak sa naglunop nga tubig ug maandam ang mga lubnganan sa ilang pagbisita gahapon ug karong adlawa.
Hinoon ang taga clean and green department sa Lapu-Lapu City government, nag-overtime sa pagpasuyop sa tubig-baha gamit ang makina.
Bisan pa man sa nasinating problema apan wala kini makapatandog sa atong kaigsoonan sa paghandom sa ilang mga mahal sa kinabuhi nga mitaliwan na sa laing kalibutan.
Daghan na nga mga tawo ang didto na lang nagpabuntag sa mga sam-ang aron masulit ang ilang bonding sa pamilya. Gawas pa dili na mahasol sa kainit ug taas nga lakawon sanglit gipangsirad-an na man ang mga karsada duol sa mga menteryo.
Gipaneguro usab sa mga otoridad ang kahapsay ug kalinaw diin gipakatap nila ang ilang puwersa sa sulod ug gawas sa mga sam-ang. Samtang ang uban, inay mangandam sa pagtimaan sa mga All Saints’ ug All Souls’ Day, aduna usay mga buhi nga nakigkompetensya pinaagi pagpahigayon og halloween party.
Imbes mag-ampo alang sa kapahulayang dayon sa mga kalag, tabla ra og gitabangan na hinoon og tambog sa impiyerno pinaagi sa paghimaya sa mga buhi sa demonyo nga character sa mga party.