Hangtud karon naglaom lang gihapon si kanhi Cebu City mayor Mike Rama nga magkasulti sila si Presidente Rodrigo Duterte. Aron personal niyang mapasabot nga wa siyay bisan gamay nga kalambigitan sa negosyo sa ilegal nga drugas. Masaligon si Rama nga makumbinser niya si Duterte nga sayop ang kasayuran nga nanalipod siya sa mga durugista.
Unang giduol ni Rama aron makatabang niya paghikay og tigom uban ni Duterte mao si Presidential Assistant for the Visayas Michael Dino. Apan way nahitabo. Sunod niyang giduol si Bong Go, ang special assistant to the President. Kinsa igo lang nitambag niya sa di pagtahan sa kapolisan kun dili sa pag-adto sa ulohang buhatan sa Philippine Drug Enforcement Agency (PDEA).
* * *
Matud ni Rama giduol sab niya si Senate President Koko Pimentel. Nga samtang maoy pangu sa partido nga nisabak sa kandidatura ni Duterte, ang PDP-Laban, wa igdungog nga sikit sa presidente. Nidangop usab si Rama ni Senador Alan Peter Cayetano. Nga bisan napilde sa niaging piniliay maoy gituohan nga usa sa labing suod ni Duterte.
Apan way natakdang tigom uban ni Duterte. May nakatambag ni Rama sa pagpatabang sa Bisaya nga Cabinet Secretary nga si Leoncio Evasco Jr. Nga kanhi pari sa wa pa magrebelde ug sa wa pa masuod ni Duterte. Busa mahimong makatabang ang mga suod ni Rama nga mga haligi sa Simbahang Katoliko.
* * *
Na-estorya ni Rama pila ka adlaw human naapil ang iyang ngan sa gibasa ni Duterte nga listahan sa giingong mga protektor sa ilegal nga drugas si Presidential Legal Counsel Salvador Panelo. Kinsa nipahibawo niya nga usa sa mga hinungdan nga ginganlan siyang Duterte mao ang iyang mga hulagway uban sa gidudahang mga durugista.
Nagduda si Rama nga gidudahan siya sa presidente tungod sa mga hulagway sa iyang pagpapanumpa ni Albuera Mayor Rolando Espinosa Sr. Nipasabot si Rama nga wa siyang kabalibad sa mga naghikay sa pagpanumpa--silang Ronda Vice Mayor Jonah John Ungab ug Asst. Cebu City Prosecutor Mary Ann Castro--kay siyay pangu sa United Nationalist Alliance (UNA) sa Kabisay-an.
* * *
Nipasabot si Rama nga padayon siyang nagpaluyo sa pamunoang Duterte bisan sa kauwawan nga nahiaguman niya ug sa mga sakop sa iyang pamilya.
Matud niya ang matang sa liderato ni Duterte maoy gikinahanglan sa nasud ug sa katawhan karon. Giawhag niyang mga Sugbuanon sa pagpangaliya nga magpabilin ang popularidad ni Duterte aron makapadayon pagpatuman sa gisaad nga kausaban.
Gihangop hinuon ni Rama ang pagdumili na ni Duterte pagbasa sa dugang listahan sa dagkong mga opisyal sa gobiyerno, kapolisan ug militar nga gilambigit sa ilegal nga drugas.
Matud niya di makiangayon nga madugangan pa ang mga mahiagom sa iyang kalbaryo tungod lang sa way sukaranan nga mga pasangil. leo_lastimosa@abs-cbn.com