Bagyong Lawin

Gikonsiderar na nga super typhoon sa Japan Meteorological Agency ang bagyong Lawin samtang nag-irog pa kini gahapon sa buntag padulong sa Northern Luzon.

May gikusgon nga hangin nga moabot  sa 305 kph ang pag-unos ug 220 kph nga sustained winds, sa paglandfall niini. Gawas sa Northern Luzon apektado usab ang Central Luzon ug ubang bahin sa Metro Manila, pinaagi sa kusog nga mga pag-uwan ug hangin.

Ang Northern Luzon makaduha gikuso-kuso sa bagyo. Una ang bagyong Karen nga nipatay og tulo ka kinabuhi, nagbilin og dakong danyos sa kabtangan ug infrastraktura.

Adlaw ra ang gintang, nibanos ang mas bangis pa nga super typhoon Lawin. Kahinumdoman puntireya unta sa bagyong Lawin ang Kabisay-an ug usa unta ang Sugbo sa maigo.

Nasuyop lang sa bagyong Karen ug sa high pressure area ang bagyong Lawin hinungdan nga inay mopa-ubos ug moagi sa Kabisay-an, nipataas kini ug nisulod sa Northern Luzon.

Bisan kun dili kita maigo sa bagyong Lawin, apan kanunay nipasidaan ang PAGASA nga dili angay mokompyansa tungod kay may epekto gihapon kini dinhi sa Kabisay-an ang bagyo.

Kini ang kusog nga paghuros sa hangin nga peligro alang sa mga sakayan sa dagat, ilabi na sa gagmay nga mga baroto kay may mga pag-uwan usab nga dala sa bagyo.

Nunot sa pagdaot sa panahon, dili man kita direktang maapektohan sa bagyo, apan may epekto gihapon kini, ilabi na sa panginabuhian sa atong mga mananagat nga dili makapangisda tungod sa dagkong bawod ug kusog nga hangin.

Dugay na nga nipasidaan ang PAGASA nga mag-anam kakusog ang mga bagyo nga atong masinati sa tibuok nasud, kini resulta sa climate change.

 Dili ra usab Pilipinas ra ang makasinati sa nagkabangis nga mga katalagman tungod kay bisan ang ubang bahin sa kalibutan makasinati na usab og kusog nga mga bagyo ug grabe nga pagbaha.

Busa, kita nga naiway sa katalagman, dili gihapon mokompyansa ug angay mangandam kanunay. Kun dunay mga pasidaan ug awhag ang mga local disaster unit sa inyong mga dapit sa pagbakwit, ilabi na sa mga nagpuyo daplin sa kasapaan, sa mga baybayon ug landslide prone areas, dili magmagahi sa pagsanong.

Apan kinahanglan usab nga sigurohon sa mga LGU nga ang evacuation areas nga padulngan lig-on ug luwas nga pasilungan, unya may igong suplay sa tubig, pagkaon, flashlights, daghang mga pansayan nga makaatiman sa sugo sa lawas ug uban pa.

Human sa kasinatian sa super typhoon Yolanda magtulo ka tuig na ang nilabay, mapasalamaton kita sa pagpakabana pinaagi sa pagpangandam sa mga LGU niining laing bangis nga katalagman.

Samtang dili kita ang grabe nga maapektohan niining makalilisang nga bagyong Lawin, atong iampo ang mga molupyo sa Luzon nga maoy direktang maigo, sa ilang kaluwasan.