Masaligan nga di kapiyalan

Dunay panultihon sa iningles nga nindot himuong inspirasyon sa kinabuhi nga nagkanayon - 'Trust No One'. Nagpasabot kini nga dili ta basta mosalig ni bisan kinsa bisan pa sa atong kaugalingon. Ngano naingon man niini nga hasta ang kaugalingon ato man wad-on ang pagsalig.

Ang tinuod usa lang kini ka ekspresyon nga naglimin og tulukibon nga kahulugan nga may kalimbigitan sa atong pagpakabuhi ug sa pakigrelasyon sa isigkatawo. Kun kini matugkad na ang tinubdan sa salabutan ug unya sagupon nga prinsipyo sa kinabuhi makaseguro kitang maangkon ang  kalamboan nga giugmad diha sa atong pagtukaw sa mga panglantaw.

Dili dautan ang mosalig sa kaugalingon kay kini mao may kusog nga mopalig-on sa atong pakigbisog. Buot lang ipasabot dili kita mokompiyansa sa pagsalig ilabi na sa kaugalingon kay dili  ra ba kita maka-alinggat nga nanubra na ang pagsalig nato. Dinhi motumaw ang abuso nga makaguba sa maayong relasyon.

Busa ayaw ihurot ang pagsalig ireserba nga aduna pay konsensiyang makahunghong aron  nga dili makompromiso ang pagsalig.

Ang kontrol sa kalidad sa pagsalig wala sa gisaligan kun dili anaa kini kanato. Dunay daghan nga mahimong masaligan apan maglisud ta pagpiyal sa unsa may mga plano nga buot natong ipahimo.

Kay kulang sila sa  pagsabot sa katuyoan kwestyonable kini alang sa himuon natong kapiyalan.

Ang may katakos nga makasalig tang kapiyalan ang ato rang kaugalingon.

Apan ang kaugalingon nga kapiyalan maantigo sa iyang mga sinaligan nga ablihan ang pagbinayloay og mga maayong hunahuna aron nga sila mahimong epektibo isip atong mga maunongon nga kasaligan.