Dear Atty. Divine:
Usa ko ka widow kay namatay ang akong bana lima ka tuig na ang nakalabay. Duna mi anak apan atoa na sa Amerika nagpuyo ug aduna nay laing pamilya. Naa koy nakaila nga ulitawong guwang ug interesado makigminyo nako. Negosyante siya ug pareho ra sad mi og edad nga kapin na sa 50 anyos. Ako na nga gisultian ang akong anak sa US ug wa man siya mosupak kay gusto sab siya nga aduna koy makauban ilabi na kay layo siya kanako. Apan nabalaka ko kay kun magminyo ko unsa may mamahimong epekto niini sa kabtangan nga napundar nako ug sa akong bana nga namatay? Unsa may angayan nako nga buhaton aron magpabiling separate ang akong property sa property aning negosyante nga gustong makigminyo nako? Daghang salamat.—Ms. G
Dear Ms. G:
Aron mamahimong separate ang imong properties sa kabtangan sa negosyante nga gustong makigminyo nimo, ang una ninyong buhaton duha mao ang pagpirmahanay og Marriage settlement o Pre-nuptial agreement sa dili pa kamo magpakasal. Sa maong agreement, inyong ilatid ang inyong nasabutan labot sa inyong kabtangan nga magpabilin kining separate lakip na ang mga properties nga inyo unyang mapalit sa umaabot. Kinahanglan nga inyong buhaton ang maong marriage settlement o pre-nuptial agreement sa dili pa kamo magpakasal aron kini mamahimong balido ug kinahanglan sab kini ninyo nga panotaryohan. So ang epekto sa Pre-nuptial agreement, bisan kun nagminyo mong duha apan ang imong properties nga gipanag-iya magpabilin kini nga separate ug exclusive property nimo ug mao sab kini ang mahitabo sa kabtangan sa imong umaabot nga kapikas nga separate ug exclusive property sab niya. Thanks and God Bless!—Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.