Kini ang kasagaran natong madungog kun maghisgot kita og mga tawo nga wa gyud nato mailhi. Wa-il as in wa ilhi. Apan sa laing bahin, kining pulonga ang gi-apply sa atong Ginoong Jesus kanilang mga tawo nga inig-abot sa panahon sa pagpanghukom ang ingnon man sa Dios: "Palayo kamo kanako! Wa ko makaila ninyo!" Nga sa ato pa diay dili garantiya nga nagsige ta og hisgot mahitungod niya o nagpunay ta og duol sa Dios apan nahimong sukwahi ang ato mismong kinabuhi. Ang Dios moingon nga wa siya makaila nato. Kini ang angayan natong hinumdoman nga kun kita makaila sa Dios ang atong kinabuhi usab ingon man pamatasan mamahimo untang sama sa Dios.... Kita mailhan di lamang sa Dios kondili usab sa mga tawo nga nakaila nato nga kita Diosnon gumikan sa atong kinabuhing balaanon. Hinaut pa unta.
Kaya mosulbong apan....
Ni Lucky Malica
Human sa 20 ka tuig, misakmit na usab ang Pilipinas og medalya sa Olympiyada sa dihang nakuha sa atong pambato nga si Hidilyn Diaz ang silver medal sa weightlifting. Sa pagkakaron, mao pa kini ang medalya nga nakuha sa nasud sa padayong Rio Olympics.
Wala gayud kita maka-expect nga ang weightlifting maoy makalangkat og medalya alang sa nasud. Kini tungod kay matag Olympiyada, Asian Games ug SEA Games, dako kita og pagsalig sa boksing nga maoy mohakot og mga medalya.
Gani ang katapusan natong mga medalya sa wala pa ang silver ni Diaz pulos gikan man sa boksing. Ug ang labing dako mao ang silver medal ni Mansueto "Onyok" Velasco nga iyang nalangkat atol sa 1996 Atlanta Olympics didto sa Estados Unidos.
Niining maong kalamboan, panahon na nga hatagan usab og dakong pagtagad sa kagamhanan ang uban pang mga disiplina. Dili ikalimod nga aduna usab kitay dakong tsansa nga mosidlak sa ubang paugnat sa kusog basta adunay insakto lamang nga training ang atong mga atleta.
Usahay makadismaya palandungon nga matag Olympiyada, halos matarantar ang atong mga sports officials pagpangandam alang sa boksing kay lagi kuno mao lamang kini ang atong paglaum nga makasungkit og unang medalya nga bulawan.
Gawas sa boksing, haskang kapuliki usab sa atong mga opisyal pagbubo og dakong resources sa atong national basketball team aron nga makalusot lagi sa mga qualifying rounds aron nga makasulod usab sa Olympiyada. Kini bisan pa man kun wala na gayud tay nahut nga makakuha og bisan pa medalyang aluminum niining maong sport.
Ambot ba. Nganong dili man lamang hatagan nato og atensiyon ang ubang matang sa sports nga sa atong tan-aw aduna kitay purohan nga mosaler? Puol na usab baya nga sige lamang boksing ug basketball ang giprayoridad sa nasud ug nga morag bulak-bulak lamang kining ubang mga atleta sa ubang paugnat sa kusog.
Ang gipakita ni Diaz didto sa Rio Olympics nagpahimangno lamang kanato nga kaya gayud sa Pilipino nga mosulbong sa ubang klase sa sports. Ang problema man gud mao nga kulang sa resources ang atong gobiyerno kay tua man lagi gibubo sa ubang sports diin dulom pa sa alkitran ang atong tsansa.