Advance party

Nagpili ang Ginoong Jesus og kapitoa’g-pito ka mga tawo nga maoy iyang advance party ngadto sa mga dapit nga iyang pagaadtoan. Tuod man ang maong mga tawo gipadala niya sa tinagurha  kon pares pares. Iya silang gihatagan og gahum sa paghingilin sa mga yawa, sa pag-ayo sa mga masakiton ingon man sa pagsangyaw sa maayong balita. Dugang pa, kinahanglang mamahimo silang dependent sa Diosnong pag-amoma labina gyud sa ilang mga panginahanglang pisikal kon lawasnon nga ang Dios mohatag kanila niini pinaagi sa mga tawo nga ilang gisangyawan.

Nibalik ang maong mga tinun-an ug gitaho nila  kang Jesus ang ilang mga accomplishments ug nga nalipay sila niini. Apan si Jesus nipahimangno nga kini dili mahinungdanon. Ang mas mahinungdanon mao nga ang ilang mga ngalan nahilakip sa lista sa mga pinili didto sa langit. Praktikal ang gihimo sa Ginoo. Sa laing bahin paagi usab kini aron iyang hatagan og gahum kon power ang mga tawo nga manginlabot sa ilang mga buluhaton. Diha sa atong tinguha nga mohimo og mga lakang alang sa pag-ebanghelyo, nahimong dakong kabahin niini ang pagrisgo. Pagrisgo nga ikaw dili dawaton. Pagrisgo aron ikaw dili paminawon. Apan kabahin lang kana ug dili ang kinatibuk-an. Ang mahinungdanon mao nga ikaw dunay sense of focus sa tanan nimong gipanghimo ... labina kun imo pang giugmad ang sukaranan sa tanan nimong mga plano.