Usa sa labing nalipay sa pahibawo sa mga tigpamaba ni President-elect Rodrigo Duterte nga isibya ang opisyal nga mga pamahayag ug kalihokan sa iyang administrasyon pinaagi sa social media mao ang Facebook. Nga agresibong niduso sa ilang live-streaming service nga giisip nga umaabot nga abundang tinubdan sa panalapi pinaagi sa advertising.
Maong di kahibudngan nga nakigtagbo dayon ang representante sa Facebook, Elizabeth Hernandez, pangulo sa Facebook Public Policy for Asia Pacific, sa communications group sa mobanos nga administrasyon aron pagtanyag nga sila ang mo-host sa live streaming sa inugurasyon ni Duterte karong Hunyo 30. Gihangop dayon sa iyang mga tigpamaba ang kahigayonan nga gitanyag sa kinadak-ang social media network.
* * *
Hinaot nga may makahunghong sa communications group ni Duterte nga di sila magtihik-tihik pagpangayo og pabor paghimo nga labing tin-aw sa live streaming sa inugurasyon. Kay ang Facebook namayad og minilyon ka dolyar ngadto sa mga kompaniya aron madasig paghimo og videos alang sa Facebook Live. Nakapirma nang Facebook og kontrata uban sa kapin sa gatos ka media companies ug celebrities.
Segun sa The Wall Street Journal mobayad ang Facebook og kapin sa $50 milyones ngadto sa media organizations sama sa CNN, New York Times, Vox Media, Tastemade, Mashable ug Huffington Post ug celebrities nga naglakip nilang Kevin Hart, Gordon Ramsay, Deepak Chopra ug NFL quarterback Russell Wilson.
* * *
Nanghinaot ang Facebook nga pinaagi sa high-quality videos nga ilang gibayran madugangan ang ilang users nga madani paggamit sa Facebook Live, nga gilaomang mosangpot sa pagkaumol sa dugang madanihon nga videos, samtang padayon silang nag-umol og mas malungtarung kauyonan sama sa pagbahinay sa kita sa advertisements.
Nipasabot si Justin Osofsky, bise presidente sa global operations ug media partnerships, nga ganahan sab silang magpakisayod sa kasinatian sa labing unang nanggamit sa Facebook Live kay mapuslanon kaayo sa pagtino unsay maayo ug unsay di maayo sa gipanggamit nga mga teknolohiya sa labing bag-o nilang plataporma.
* * *
Apil sa nakadawat sa labing dagkong bayad sa Facebook ang BuzzFeed, $3.05 milyones; NYTimes, $3.03 milyones; ug CNN, $2.5 milyones. Sa wa pang Facebook Live, gidasig nang daan ang ilang users pag-upload og videos. Sa labing uwahing ihap, ang Facebook users manan-aw og hangtod sa 100 milyones ka oras nga video matag adlaw.
Nagsunod ra hinuon ang Facebook Live sa mas nag-una nga live streaming services sama sa Snapchat, Ustream nga napalit karong bag-o sa IBM, Periscope nga gipanag-iya sa Twitter ug YouTube nga gipanag-iya sa Google. Apan kay 1.65 bilyones na man ang ilang users sa tibuok kalibotan, gihulagway ang Facebook nga maoy naghupot sa labing dakong kahigayonan pagkontrolar sa merkado nga gibanabanang mobalor og $9.8 bilyones sa Estados Unidos lang. leo_lastimosa@abs-cbn.com.