P2,000 usbaw sa SSS pension

Ang rason ni Presidente Aquino sa iyang pagbasura o pag-veto sa balaudnon nga mag-usbaw og P2 mil sa SSS pension sa matag pensioner kada buwan, mao ang kabalaka nga basin unya og mabangkarota ang SSS.

Base kuno sa kwentada nga magkinahanglan og P56 bilyones matag buwan alang sa maong katuyoan.Sa ato na nga gihisgutan dinhi, dili ug dili mabangkarota ang SSS.

Daghan kini’g kuwarta ug mga katigayonan, sama sa condominium units, mga building, parking lots, ug office spaces. Dugang niini, gumikan sa pagpabaya sa SSS, may collectibles kini nga mokabat og P325 bilyones.

Daghan og kuwarta ang SSS, hinungdan nga naka-afford sila paghatag og mga dagkong suweldo ug mga allowances unya nagpatuyang sa dagkong gasto.

Sa 2004 nga audit sa COA, nahibaw-an nga ang SSS migasto og P117 million in salaries & allowances alone. Gani, mimando ang COA pagpauli sa P71 million nga unauthorized allowances. Dugang niini, anaa sa Charter sa SSS nga obligasyon sa gobiyerno sa Pilipinas pag-subsidize o pagbubo og dugang capital ngadto sa SSS aron nga dili kini maapiki sa panudlanan, sama sa atong pag-subsidize sa mga ahensiya nga gipanag-iya sa gobiyerno.

Sa 2015, ang subsidy ngadto sa mga government-owned & controlled corporations mikabat og P78.01 milyones. Nganong dili man kini mahimo ngadto sa SSS kun gikinahanglan man?

Busa akong usbon, dili ug dili gayud mabangkarota ang SSS, Mr. President. Ambot ngano nga mituo man si President Aquino sa hulhog ug tambag sa kadagkuan sa SSS nga mahutdan kuno og kuwarta ang SSS kun ihatag ang P2 mil nga usbaw sa matag SSS pensioner?

Unya, nangayo sila og tag P1 million nga performance bonus alang sa ilang mga executives. Maayo man gani kay gibalibaran sila sa mga kongresista.

Sila si Kongresista Neri Colmenares ug mga kauban, andam na unta pag-override sa pag-veto sa presidente, apan, naabtan sila sa election fever ug wala na sila maka-quorum, wala na maka-override sa presidential veto. Nahugno ang mga SSS pensioner. Apan, kalit nga nabanhaw ang kahimuot ug kalipay sa mga senior citizen sa pasalig ni President-elect Digong Duterte nga iyang idayon paghatag ang P2 mil nga SSS pension hike.

Ug wala kuno siya magkinahanglan sa congressional action alang ning maong katuyoan. Gi-warningan usab ni Duterte ang SSS ug ang GSIS niining pagpahulat og dugay sa mga pensioner nga mag-follow up sa ilang mga claims ug ubang kinahanglanon.

Matud niya: “Both the SSS and the GSIS should shape up and make sure that their members are better served.”  Bitaw!