Proud to be a Journalist!

Kanunay mapasaran sa paniudto ngadto na sa alas dos, o alas tres sa hapon, sanglit mag-apas man nga maka-interview sa mga news sources ilabi na kun kontrobersyal nga mga isyu nga kinahanglan nga kuhaan og side ang matag habig nga nalambigit sa estorya.

Magdalidali aron maabtan ang mga interbyuhon, ilabi na kun magpa "hard to get" ang mga interbyuhonon nga kinahanglan pa nga atangan o i- ambush interview aron maluto ang estorya.

Ipakagamay o kaminosan pa sa mga mapahitas-on nga mga opisyal sa kagamhanan ug bisan sa mga hepokrito nga mga indibidwal. Bisan unsa kalayo ug delikado ang assignment kinahanglan adtoon aron makita ang aktwal nga panghitabo ug mapahibalo ngadto sa publiko, nga walay sobra ug walay kulang.

Magsakripisyo bisan og nangahulogan pa nga ibuhis ang kinabuhi apan tungod ug alang sa serbisyo nga walay katumbas nga salapi. Mas maayo pa gani ang mga sundalo ug polis kay anaa man sila’y mga pusil nga ikapanalipod sa ilang kaugalingon apan ang media, camera, microphone, ballpen ug papel ra ang armas.

Ang journalism usa ka sagrado nga bokasyon diin ang "kredibilidad" maoy lig-on nga hinagiban nga gihuptan aron dili madutlan sa bisan unsa nga pagpangatake sa institusyon, ilabi na sa isyu sa kurapsyon.

Alang niadtong mga Vultures of Journalism o mga kurakot nga migamit sa ngalan sa institusyon, angayan lang kundinahon ug motago kun madutlan pa sa kauwaw.

Apan alang sa mga nagtinuod nga Crusaders of Truth nga wala magpahaylo sa kuwarta, magpabilin nga nakataas ang agtang nga moingon "Proud to be a Journalist!"