Dili makaayo alang sa gobiyerno ug sa simbahang Katoliko kun dili maundang ang panagbangi tali sa mga Obispo sa Romano Katolikong simbahan ug ni President-elect Rodrigo Duterte.
Nagkasungi ang mga Obispo nga sakop sa Catholic Bishops Conference of the Philippines ug si Duterte tungod sa mga programa ug palisiya nga gustong ipatuman sa umaabot presidente sa Pilipinas. Una na nga gipahayag ni Duterte nga limpyohan ang nasud sa mga kriminal, ipatuman ang three-child policy, ug ibalik ang death penalty.
Ang mga Obispo nagtamod sa pagtulon-an sa simbahan nga nagdili sa pagpatay, busa gikondenar nila ang extra-judicial killings ug ang mga pamaagi sa pagplano sa pamilya nga matud nila supak sa kabubut-on sa Dios.
Sa laing bahin, si Duterte nagmasuk-anon nga namahayag nga may nahibaw-an siya kabahin sa simbahan. Nanggawas sa mga balita nga gi-post usab sa Facebook, ang kaadunahan sa simbahan, lakip na ang mga investment sa mga Obispo sa mga dagkong kompaniya sama sa San Miguel Corporation, taliwala sa kakabus sa mga yano nga parokyano, ug ang pagpabayad sa mga parokya sa mga serbisyo ngadto sa katawhan sama sa bunyag, kasal, ug lubong.
Taliwala sa niyagyagay og baho sa duha ka habig, wala pay mipatunga aron mutabang pagtakdo sa nagkabulag nga panglantaw sa mga Obispo ug ni Duterte. Apan adunay usa ka pari nga taga-Labangon nga atua karon nagmisyon sa Peru, walay puas sa pagpahinumdom sa mga Obispo nga dili maayo nga ipasulabi ang kataas sa posisyon ug ang nakat-unan kabahin sa moralidad aron padayong gub-on ang ngalan ni Duterte. Gani, usa sa mga pari sa Davao miawhag kang Duterte: “Don’t be a monster.”
Para kanako, usa lang ka tawo si Duterte. Duha ka dalunggan lang ug usa ka kasingkasing ug hunahuna ang anaa kang Duterte, ikomparar sa kadaghan sa hunahuna, kasingkasing, ug dalunggan sa ka-obispohan sa nasud.
Ang akong punto mao: mas maglisod og paminaw ang daghang dalunggan, pagpakita sa kaluoy sa kadaghang kasingkasing, ug malisod pagpinsar gamit ang daghang hunahuna.
Sama ni Fr. Loreto Jaque, nagtuo ko nga kun ang mga Obispo ang mopaubos ug molukat og tiket aron adtoon si Duterte aron maminaw, mokalawat sa iyang “putang ina,” makigtutok, makig-estorya, makig-lamano, makiggakus, ug makigkaon og monggos ug bulad, mas mailhan nila nga mas dako ang gipas-ang suliran ni Duterte kay kanilang mga Obispo.
Dili lalim nga botohan ka sa kapin 16 milyones ka tawo tungod sa mga saad nga pagbag-o – mga saad nga kasagaran sakit sa galamhan ug makapanglimbawot sa balhibo sa mga Obispo ug kaparian.
Mga saad nga sama sa tulo ngadto sa unom ka bulan nga pinatyanay sa mga kriminal nga mosukol sa mga awtoridad, mga saad nga limpyohan ang gobiyerno sa mga kurakot, ug mga saad nga himuong malinawon ug maangayon ang Pilipinas.
Daghan ang misinggit og “separation of church and state.” Para nako, matuman lang kini kun walay peke nga kasingkasing ug hunahuna.