Niining paglingkod unya ni Mayor Digong Duterte isip bag-ong pangulo sa nasud, karon ato nang mahulagway ang dagway sa atong nasud sa mosunod unom ka tuig pinasikad sa pasiunang mga lakang ug mga pamahayag ni Duterte.
Nagkasagol ang mga speculations, ang uban naghulagway sa malinawon ug malambuon nga nasud, samtang ang uban naghulagway og kabalaka. Apan, alang sa kadaghanan, ilang hatagan ang bag-ong presidente sa igong panahon pagmatuod ug pagtuman sa iyang mga saad ug mga laraw sa miaging piniliay.
Sa mga standby pa, kining walay-lingaw nga mga molupyo (apan malipayon) nagkanayon: “Let us to wait and see!” Alang nako mao kini ang hustong attitude. Huwat lang gud ta.
Pagkakaron, atong malantawon ang dagkung mga kausaban pagpadagan sa gobiyerno, gikan sa traditional nga mga paagi sa traditional nga mga politico, diin mahitaligam-an ug masalikway ang mga yanong lungsoranon.
Labing seguro, niining pamunoan unya ni Duterte, kitang mga yanong lungsoranon kahatagan na sa samang kahigayonan pagpakabuhi uban sa giingon nga “establishment” ug sa mga elitist nga karon, sila lamang ang nagpahimulos sa katigayonan ug mga resources sa nasud.
Mao kini ang atong mapaabot unya sa pamunoan ni Mayor Digong Duterte. Sa giingon ni Presidente Ramon Magsaysay, hatagan og mas dakung pagtagad ug kahigayonan ang mga yanong lungsoranon kay sa hamugaway nga molupyo ning nasud.
Atong makita ang katumanan sa mga pangandoy ni Magsaysay, ang presidente sa masa, niining pamunoan ni Duterte. So, ‘let us to wait and see.’
* * *
Pipila ka kapitan sa barangay ning dakbayan ang mitutol niining kamanduan ni Acting Mayor Margot Osmeña, pagpa-recall ug pag-inventory sa mga sakyanan sa gobiyerno nga gi-assign sa mga barangay.
Giklaro ni Osmeña nga ang bugtong katuyoan niini, mao lamang ang pag-inventory sa maong mga sakyanan, gumikan sa mga akusasyon nga pipila sa maong mga sakyanan giabusahan sa kadagkuan sa barangay.
Gitin-aw usab sa acting mayor nga walay labut sa recall ang mga ambulansiya, ang mga garbage trucks, ang mga police cars, ug ubang mga sakyanan nga gigamit solely ug direktamente sa specific nga serbisyo.
Sa atong pagsulat niini, ubay-ubay nang mga kapitan sa barangay ang miuli na sa ilang mga sakyanan, apan, pipila kanila nagdumili pagtuman sa maong memorandum sa acting mayor. Pastilan!
Tapus sa physical inventory, ibalik man tingali ni ninyo kun makita nga i-serbisyo gayud sa taga-barangay ug dili exclusive use sa mga kapitan lamang. Kap?