Tuig 2005, dihang ako ang na-assign isip graveyard shift reporter nga ingon sa nahimo nga ordinaryo na lang ang pagkober sa mga tawo nga gipamusil patay dinhi sa dakbayan sa Sugbo. Gani dili lang usa, kun dili, duha ka biktima matag gabii ang gipangbuk-an sa ulo, apan ang dili nako mahikalimtan diha nga nag-interview ko sa pamilya sa usa ka lalaki nga naghay-ad human gipusil sa gihulagway nga riding in tandem.
Aduna na usa’y laing gialarma sa unahan nga gipusil usab, mao nga dali namo nga giadto ug samtang nagpadulong kami sa dapit nahitaboan, duna kami natagboan nga lalaki nga gisakay sa kariton nga nagkadugo ug naghingutas sa iyang ginhawa kay nakaangkon og samad pinusilan sa dughan.
Abi nako ug mao na kadto ang gialarma apan dili pa diay sanglit sa unahan didto ang laing lalaki nga mituasik ang utok human pusila sa riding in tandem.
Sa usa ka gabii nga coverage nako, tulo ka kinabuhi nga gikutlo. Common denominator nila nga nalambigit sila sa ilegal nga drugas ug ang uban mga ex-convict nga bag-o lang nakagawas sa bilanggoan.
Nagpabilin nga tanghaga hangtod karon kinsa ang nagpaluyo sa gihulagway nga vigilante-style killing. Dili layo ang posibilidad nga subling mobanaw ang dugo sa mga kriminal o suspetsadong kriminal.
Sa press conference ni presumptive President Rodrigo Duterte, gipahibalo niya ang iyang "shoot to kill order" sa kapolisan ngadto sa mga tawo nga molapas sa balaod ug mosukol sa mga otoridad.
Ang mga badlongon dili na moabot pa sa piskalya o sa korte tungod kay kutob na lang sila unya sa sumbohan sa armas sa mga modakop kanila.
Pila ra man ang pag-ingon nga lehitimo ang operasyon ug nisukol ang suspek hinungdan nga gipusil na lang. Gawas pa, dili na mahasol ang mga tinugyanan sa balaod sa pagtambong sa hearing sa korte kay gisentensiyahan na man nila kining daan.
Samotan pa nga mitanyag si Cebu City Mayor-elect Tomas Osmeña og reward sa mga polis nga makaigo sa mga durugista. Kining tanan panglantaw lang, apan gibase sa kasinatian sa dakbayan.