Duha ka hakog sa Vatican
Usa sa mga tinubdan sa sakit sa dughan ni Pope Francis sa kahinay sa dis-og sa iyang kampanya paglimpiyo sa Vatican ug pagpaduol sa Simbahang Katoliko ngadto sa katawhan mao si Monsignor Giuseppe Sciacca. Kinsa nangandoy og mas lapad nga pinuy-anan kay ganahang mobangka og kumbira sa iyang mga higala. Alang niya apiki rang matahom niyang apartment sa Palazzo San Carlo, bisan libreng abang.
Dihang gitudlo siya ni Pope Benedict XVI niadtong 2011 nga ikaduhang labing taas nga opisyal sa Governorate, tagduma sa panalapi sa Vatican, nakakita si Sciacca og kahigayonan pagpadako sa iyang pinuy-anan. Gihimong tig-a ang iyang kasingkasing ug gisalikway ang bisan unsang kaikog.
* * *
Ang naumol niyang plano labihan kamapangahason nga lisod tuohan hangtod karon. Nahimong puntirya sa iyang kahakog ang iyang silingan, hamtong, buotan ug masakitong pari nga dugay nang nagluya. Nahibaw-an ni Sciacca nga ang pari na-ospital ug mahimong himatyon na.
Wa mag-usik og panahon ang Italyanong si Sciacca. Gitawag dayon ang sinaligan niyang kontraktor ug gipaguba ang koral taliwa sa duha ka apartments aron nga masumpay ang duha ka units. Bisan nahibung ang kontraktor ug iyang mga trabahante, nahuman ang trabaho sud lang sa pila ka oras.
* * *
Nadugangan ang apartment ni Sciacca og usa ka kuwarto, samtang ang apartment sa masakiton nga pari nihiyos. Wa pa matagbaw si Sciacca. Iya pa gyong gikuha ang mga lamesa, mga lingkoranan ug mga aparador sa pari. Ang personal nga kabtangan sa pari gibutang na lang sa mga karton.
Bisan naanad na sa mga eskandalo, naglisod pagtuo ang tibuok Vatican dihang nikatap ang kasayuran sa maniobra. Makapalandong ka sa kakugang sa pari dihang gitugotang makapauli gikan sa ospital. Pag-abli sa pultahan, nahibaw-an nga naibanan og usa ka kuwarto ang iyang apartment. Apan luya na siya aron mangita og hustisya.
* * *
Wa magpatara ang iyang kaabag nga madre. Nagpatambag sa iyang kaubanang madre. Nisuwat siya sa Santo Papa ug nagpakiluoy. Human sa pila ka buwan, namatay ang pari, ni-resign si Benedict XVI ug napili sa conclave si Pope Francis. Kinsa wa katingog sa unang higayon nga nakadungog siya sa gihimo ni Sciacca.
Gitangtang ni Pope Francis si Sciacca sa Governorate, gihatagan og mas ubos nga katungdanan ug gipalayas sa gipalapdang apartment. Gipahibawo sab si Pope Francis sa susamang pakauwaw ni Monsignor Bronislaw Marawiec. Kinsa nasakpang nibuslot sa sawog sa ibabaw niyang apartment ug nibutang og naglikus-likos nga hagdanan aron madoble ang iyang pinuy-anan. Nakonbikto hinuon ang Polish nga si Marawiec sa laing kaso sa pagpangawkaw ug nasentensiyahang mapriso og tulo ka tuig. [Kabahin ni sa librong “Merchants in the Temple” ni Gianluigi Nuzzi pinasikad sa sekretong mga dokumento nga maoy nakapaulbo sa padayon pang gihusay nga “Vatileaks scandal.”]
* * *
- Latest
