Semana Santa na!

Dakong kalihokan sa simbahang Katoliko ang paghandom sa Semana Santa ug gani hingpit na ang pagpangandam sa atong kaigsuonang Katoliko. Ang uban mopahimulos usab pinaagi sa pagbakasyon sa probinsya kay taas-taas man ang mga adlaw nga walay trabaho.

Sa dili pa kamo mobiyahe, himoa gyud usa ang tukmang pagpangandam aron luwas ang atong panimalay sa sunog ug luwas kita sa atong pagbiyahe.

Alang sa mga adunay sakyanan, isiguro ang pag-check sa atong gitawag nga BLOWBAG (Battery, Lights, Oil, Water, Brake, Air ug Gas) aron dili kita mapalyar sa atong taas nga biyahe.

Kay lagi taas man ang bakasyon, kinahanglan usab nga atong sundon ang mga fire safety tips aron hingpit nga luwas ang atong balay sa sunog ug makasiguro kita nga duna pa kita'y kaulian nga pinuy-anan.

1.) Kadtong mahilig pagdagkot og kandila sa ilang mga altar, palonga gyud sa dili pa kamo mobiya sa panimalay. Isiguro usab nga layo kini sa mga butang nga daling masunog, sama sa kurtina ug mga papel.

2.) Kinahanglan nga ma-check ang atong LPG hose ug regulator kun duna ba kini leak. Ug kun masuta nga duna, ilisi dayon kini og bag-o.

3.) Isiguro nga maibot ang tanang nakasaksak nga mga dekuryente nga appliances ug mas labing maayo kun palongon ang breaker o plangka.

4.) Mas maayo nga manglimpyo sa panimalay sa dili pa mobiyahe aron hapsay kini ug ipanglabay ang mga sagbot ug mga butang nga daling masunog.

5.) Isiguro ninyo nga wala’y naka stock nga highly flammable liquid sa sulod sa atong panimalay. Ipagawas gyud kini aron hingpit nga luwas kita sa sunog.

Ang inyong kabomberohan maglaom nga hapsay ug solemne unta ang atong pag-obserbar sa Semana Santa ug nga dili lang kay lulinghayaw ra ang atong pagahimoon sa maong taas nga bakasyon.

Pahimuslan usab unta nato nga makapamalandong kita ug makaapil sa kalihokan sa simbahan.