Pagmatngon

Nasubhan gyud og usa ka dakong sunog ug may nakalas pa gyud nga kinabuhi sa usa ka tiguwang sa unang adlaw sa pag-obserbar sa Fire Prevention Month 2016.

Ang sunog sa Barangay Sambag 2, dakbayan sa Sugbo miugdaw og 15 ka panimalay. Base sa imbestigasyon, ang nagsiga nga lampara sa lawak sa tiguwang nga namatay maoy nakaingon sa sunog.

Kapila na gyud nato kini gibalikbalik nga kun mogamit kamo og kandila o ba kaha lampara, isiguro gyud nga mapalong kini sa dili pa kamo hingpit nga matulog aron makalikay sa sunog.

Sanglit anaa na man kita sa Fire Prevention Month, ipaambit na pud sa inyong kabomberohan ang pipila ka fire safety tips.

1.) Ibutang ang numero sa fire department duol sa inyong telepono. Ang atong hotline kay 160.

2.) Limpyohi ang inyong panimalay ug ilabay ang mga sagbot, mga papel ug uban pa nga mga butang nga daling masunog.

3.) Ibutang ang pusporo sa lugar nga dili daling makab-ot sa mga bata.

4.) Ayaw ibutang ang lampara duol sa kurtina o sa lugar diin dali kini nga matumba. Palunga sa dili pa matulog.

5.) Ayaw pagtago og mga butang o materyales sulod sa balay nga daling masunog, sama sa gasolina, alcohol o pintura.

6.) Regular nga ipatan-aw ang koneksyon sa inyong kuryente ug ipaayo lang kini sa lisensyadong elektrisyan

7.) Palunga ug tangtanga sa koneksyon ang tanang appliance nga de-kuryente kun wala kini gamita.

8.) Ayaw pulihi og sinsilyo, wire o ubang klase sa metal ang mga nibuto nga fuse.

9.) Palunga ang sigarilyo ug siguradoha nga bugnaw ang sulod sa ashtray sa dili pa kini ilabay. Ayaw panigarilyo nga maghigda.

10.) Palunga ang tanang kandila o lampara ug uban pang kagamitan nga nagamit og kuryente o gas kun wala na kini gamita.

11.) Ayaw pasagdahi ang kaha kun ikaw nagluto o nagmantika.

12.) Ayaw ipadayon pagbutang sa pagkaon kun nag-aso na ang kaha. Palunga una ang stove ug pabugnawa ang mantika.

13.) Kun magkayo na ang kaha, taboni kini og basa nga panapton o tuwalya ug pabugnawa una sulod sa 30 ka minutos. Pipila lamang kini ka mga fire safety tips nga kun inyong hatagan og igong pagtagad mahimong hingpit kamong luwas sa sunog.