Fire prevention month

Sugod Pebrero 29 hangtod sa Marso 31, ang nasud muobserbar na usab sa Fire Prevention Month.

Gipahibalo sa Bureau of Fire Protection (BFP)7 nga ang tema karong tuiga sa pag-obserbar sa Fire Prevention Month mao ang "Kaalaman at Pagtutulungan ng Sambayanan, Kaligtasan sa Sunog ay Makakamtan."

Ang atong tema haom ug tukma kaayo sanglit, gihingusgan man sa atong kabomberohan ang aktibo nga partisipasyon ug pagpakabana sa publiko aron mahimo kita nga luwas sa sunog.

Gani dinhi sa BFP-7 Central Visayas, ang pag-obserbar sa usa ka buwan nga kalihukan sugdan sa usa ka kick-off ceremony karong Pebrero 29 pinaagi sa usa ka "Walk for a Fire-Free Nation."

Human sa paglakaw nga mosubay sa pipila ka karsada dinhi sa dakbayan, himoon dayon ang usa ka santos nga misa ug adunay fire and rescue drill nga ipasundayag sa rehiyonal nga buhatan sa BFP 7.

Isunod dayon ang motorcade diin salmotan kini sa mga nagkalainlaing fire stations dinhi sa Sugbo ug tanang mga fire volunteer brigades sa kabarangayan ug lakip na ang FIL-Chi Volunteer Brigade, ERUF ug uban pa.

Daghan ang mga nakalinya nga kalihukan sa tibuok buwan sa Marso nga maoy buwan dinhi sa Pilipinas nga magsugod na ang ting-init.

Kinahanglan nga niining mga panahona, andam kita kanunay sa posibilidad nga dunay sunog nga mahitabo gumikan sa grabeng kainit sa panahon.

Apan aron maminosan ang mga sunog nianang panahona, kinahanglan nga ang tanan maningkamot sa pag-apil sa mga pagahimoong fire safety seminars and lectures sa matag fire stations sa inyong lugar.

Ang kahibalo ug kaalam kabahin sa fire safety dako kaayo og ikatabang nga makalikay kita sa sunog. Unta nga inyong pahimuslan ang higayon nga makakuha kamo og kahibalo kabahin niini.