Panahon sa pag-ampo. Kini kasagaran ang atong madunggan nga ibungat ni bisan kinsang tawo nga nangita og tubag sa daghang pangutana kalabot sa kinabuhi. Daghan ang di kuno makaampo kay busy, wa nay panahon alang niini, ang uban nideklarar nga sila mga atiyesta! Mao nga di na sila motuo sa Dios kay alang nila ang tanan kabahin lamang sa liyok sa pwersa sa uniberso. Apan ang maong panlantaw nagpaila lamang nga daghan nato ang buot makighiusa sa Dios sanglit sayud man kita sa atong pagkakita nga kita mga tawo lamang ug dili hingpit. Mao kini ang hinungdan kun nganong mangita kita og mas hingpit pa kay kanako ug ang pag-ampo maoy buhing timaan sa atong pagpangita sa bisan unsang Balaan. Buot kita nga makighiusa Kaniya sanglit dako man ang atong pagtuo nga pinaagi sa maong kahiusahan mabatonan nato ang tinud-anay nga kalinaw. Ang unang lakang sa pag-ampo nagasukad man sa atong tinguha sa Balaan ug kini maoy nakapahilom nato aron mohunong ug mamalandong sa tumong ug tuyo sa atong Love Story uban sa atong Ginoo.