Dear Atty. Divine,
Nagbuwag mi sa akong asawa ug tua kaniya ang among usa ka anak. Akong nahibaw-an nga aduna nay laing gikapuyo ang akong asawa karon didto sa ilang probinsya.
Nagsuporta ko sa among anak apan tungod kay may live-in partner na man ang akong asawa, gusto unta nako nga kuhaon ang bata gikan kaniya ug ako ang mo-custody niini. Unsay angay’ng buhaton aron makuha nako ang akong anak? Daghang salamat.— Melvin
Dear Melvin,
Kun legitimate ang inyong anak, kamong mga ginikanan pulos adunay katungod sa bata.
Apan base sa balaod, kun magbuwag ang magtiayon ug ang bata below seven years old, kinahanglan nga dili ibuwag sa inahan ang bata, ug kun more than 7 years old na ang bata, mahimo na siya nga papilion kun kinsa ang gusto niyang kuyugan sa iyang ginikanan.
Ang maayo nimo nga buhaton mao ang pagpakig-estorya sa imong asawa ug hangyuon nimo nga ikaw ang mo-custody sa inyong anak.
Pananglit mosugot siya, then maghimo kamo og kasabutan labot niini ug iapil ninyo sa terms and conditions ang visitation rights sa bata.
Kun dili siya mosugot, then modangop gyud ka sa korte pinaagi sa pagpasaka og Petition alang sa pag-custody sa bata ug ang korte na ang modesisyon niini. Thanks and God bless. - Atty. Divine
Alang sa inyong pangutana may kalabutan sa problemang legal, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.