EDITORYAL - MILF, MNLF angay mag-usa

Idlas gihapon kaayo ang gidamgong kalinaw didto sa Mindanao karon nga makonsiderar nang 'patay' ang Bangsamoro Basic Law.  Apan dili gyud mahimo nga ang usa lang ka habig maoy atimanon sa gobiyerno, kinahanglang ikonsiderar gyud ang laing paksyon sa mga rebelde ug ang tanang sektor diha sa Mindanao.

Sa nahitabo sa BBL, nabalik ang kakulba sa posibleng mahitabo ilabi na sa kung unsay buhaton karon sa 10 mil ka mga rebeldeng sakop sa Moro Islamic Liberation Front (MILF), ug bisan ang ilang mga pamilya gipangulbaan kay daghang mga posibleng mahitabo nga dili maayo alang sa tanan.

Dili man gyud pud kalikayan nga masilo  ang Moro National Liberation Front (MNLF) kinsa maoy unang gikasabot sa gobiyerno kay matud pa wala matuman ang ilang nasabotan sa Tripoli Agreement.

Apan unsaon man kaha karon sa gobiyerno pagsulbad kining problema sa Mindanao kun ang mismong mga nagrebelde wala man magkasinabot? Asa man mopalugar ang gobiyerno ani sa tunga?

Iampo na lang sa tanan nga samtang tuod og nabasura na ang BBL, magpabiling hilom ang sumbohan sa mga armas sa tanang habig aron dili masamok. 

Dili makaayo sa MILF ug sa MNLF ug labaw sa tanan sa tanang taga Mindanao kun molusad sila og mga pag-atake aron lang ipakita ang ilang pagkadismaya.

Angay pa gani nga maghiusa sila aron usahon ang ilang tumong aron way kalibog ini og balik unya nila pakigsabot sa kalinaw sa gobiyerno bisan kinsa pa ang molingkod nga bag-ong presidente.

Usa ka ehemplo niini kadtong nahitabo sa Mamasapano ug Zamboanga siege nga binuhatan lang sa pipila lang ka paksyon nga dunay kaugalingong interes ug di sa MNLF ug MILF.

Dili unta sila magpadala sa mga susama niining mga laang nga gustong birahon ang ilang mga grupo nga makigiyera na usab sa gobiyerno. 

Niadtong gipatuman ang ceasefire, adunay mga kalamboang natagamtaman sa mga kaniadto gubot nga bahin sa Mindanao. Mahimo ra diay kini kun hilom ang mga armas.