Ang pagsayaw

Ang pagsayaw maoy usa ni ka linawas nga mensahe sa mga kiay sa atong pagkatawo. Naghatag ni'g kahulugan sa kalipay, inspirado, pagdayeg, paghalad ug kahimuot sa kaugalingon ngadto sa isigkatawo. Ang inato o inantigong pagsayaw, wala magkinahanglan og pormal nga pagkiay aron mosayaw.

Igo na nga ipaundayon ang linihokan sa pagkiay sa madungog nga tugtog o tonada sa musika. Bisan pa'g walay musikang madungog, ang pagsayaw gidiktar ka na sa kahinangop sa kaugalingon, aghat sa kahiladman nga igawas ang pagbati, pinaagi nga ikiay sa hunahuna, ang mga mensahe diha sa pagsayaw.          

Ang pagsayaw, usa ni sa maayong ehersisyo nga pisikal nga giduyogan sa kaisipan. Makapawagtang kini sa depresyon, nga mopalig-on sa pagsanta nga di madaug sa mga problema o sa makamatay nga 'stress'. Mopahapsay sa gubot nga panghunahuna ug kahayahay sa dughan nga di maantimano ang kasingkasing. Mopabaskog sab ni sa tuhod o mga lutahan ug ang kabukogan molig-on. Hastang mga toksik sa lawas mangatuasik aron kalimpyohan nga di magkasakit.

Kun may mosantop nga negatibo sa panghunahuna, mas maayo isayaw na lang basig makakab-ot ka'g oportunidad nga mabatonan ang paglaum, di ba        maayo?

Ang imong pagsayaw di lang ikaw ang mabenepisyo ini, kun di hasta ang nagsud-ong  kanimo, mahimuot nga sa daklit nga panahon nakadalit ka’g kahupayan sa ilang kasagmuyo ning kinabuhia. Makabig sila nga mokuyog kanimo sa pagsayaw aron ibayaw ang kalipay nga mopawala sa kalaay.

Sa pagsayaw, ipahimutang lang sa hustong lugar, basi'g masaypan kita nga nawad-an sa kabuot. Pwede makigsayaw sa kadaghanan o himuong talento kini, aron permi makasayaw nga may arte aron ikaw kapasidunggan sa kahanas o sa katalagsaon sa abilidad mo sa pagsayaw. Ug may posibilidad nga ikaw mosikat.