Ang pagpili og pangulo ug ubang posisyon sa gobiyerno dili komedya ug angay’ng dili lang kini ibase kun kinsa ang sikat, kun dili, kinsa ang haum sa katungdanan pinaagi sa taas nga kasinatian ug nindot nga plano sa kalamboan sa nasud.
Kay dili malangkat sa pagkatawo sa kandidato ang iyang batasan ug kinaiya nga makaapekto sa matang sa iyang liderato ug sa iyang pagdumala mao nga angay’ng apilon kini sa pagkilatis sa mga botante.
Si Bise Presidente Jejomar Binay, kanhi mayor sa Makati City sulod sa kapin 20 ka tuig apan nag-atubang og imbestigasyon sa pasangil nga gipaburot ang presyo sa pagpatukod sa Makati building ug mga tinago nga bahandi.
Si Senador Grace Poe laing kandidato sa pagka presidente apan kaduha-duhaan pa kun kuwalipikado ba siya tungod kay gireklamo siya sa rason nga kuwang pa sa 10 ka tuig ang pagpuyo sa nasud aron magpapili nga pangulo. Wa say klaro kun siya natural-born Filipino citizen ba kay wala masayri kun kinsa ang iyang mga ginikanan.
Si Mayor Rodrigo Duterte sa Davao gusto sab nga mag presidente. Nailhan siya tungod sa iyang pag-angkon nga iyang gipangpatay ang mga naghimo og krimen sa iyang dapit, mao nga linaw kuno ug luwas puy-an.
Giangkon usab niya nga duha ang iyang asawa ug may duha pa ka uyab. Iya usab nga gibalikas ang Santo Papa kay maoy nakaingon sa traffic sa Manila dihang mibisita kini sa nasud. Si Mar Roxas magpapili usab nga pangulo sa nasud. Siya ang sekretaryo sa Department of the Interior and Local Government sa wala pa modesider nga magpresidente.
Kanhi kongresista sa Capiz ug senador diin gitawag siya nga amahan sa mga call center agents tungod sa iyang pagpangamahan sa balaod nga nagtugot sa Business Processing Outsourcing.
Naila si Mar nga Mr. Palengke tungod sa iyang pag-monitor sa mga presyo sa merkado aron maprotihean ang mga konsumidor sa dihang siya pa ang sekretaryo sa Department of Trade and Industry.
Sukad nangalagad sa gobiyerno wala madungog nga nalambigit si Mar sa pagpangawat sa bahandi sa nasud.
Sila ang mga nag-una sa mga presidentiables. Kamo kinsa ang inyong pilion? Dapat Tama kita sa atong pagpili og pangulo ug ubang posisyon sa nasud.