Brgy Fuente, Carmen, Cebu

“Ang mga kahoy’ng tugas diri sa among bukid gihurot na man sa pagpanggabas. Asa na man ang gobiyerno, labi na sa taga DENR, nga wala man sila kabadlong ani nga klaro man ning wa gyu’y permit. Naa man untay gibutang diha nga guwardiya, wala man badlonga.”

Brgy Sta. Rosa, Lapu-Lapu City

“Diri dapit sa Sitio Bunga daghan kaayong mga binuhi nga baka ug kanding nga naa lang itugway daplin sa karsada. Daghan na nga mga motorista nga nadisgrasya diri kay mokalit lang og labang ang mga hayop sa karsada.”

Brgy Looc Norte, Asturias, Cebu

“Nag-usik-usik ra sa kwarta ang among barangay aning gipatukod nga health center nga sipyat ang pagkatrabaho, pwerteng batia. Dili man tingali gyud klarong panday ang gipatrabaho kay wa magkadimao. Duna tingali nakakomisyon.”

Brgy Banilad, Cebu City

“Mibalik na man sab ang estambay nga mga rugby boys atbang sa Country Mall, kilid sa PDI Condo, nga nakahasol sa ubang mga tawo nga moagi. Naa say mga batan-on nga mag-skateboard, kuyaw sab sa mga sakyanan.”

Brgy Tungkil, Minglanilla, Cebu

“Awhagon namo ang mga opisyal sa lungsod nga ila untang mandoan ang garbage collectors nga kuhaon ang mga basura diri dapit sa Deca Homes kay pila na ka adlaw nga wala kuhaa, nabaho na ang uban.”

Brgy Pajo, Lapu-Lapu City

“Diri sa may Seaside wala man gyud humana ang pagtrabaho sa karsada, ila ra man gibiyaan. Daghang nahasol nga molupyo diri ug luoy kaayo ang mga tawo, labi na kun mag-uwan kay magbaha dayon.”

Brgy Busay, Cebu City

“Hangyo unta mi sa mga opisyal sa siyudad o ba kaha sa LTO-7 nga unta naay ID ang tanang habal-habal driver nga nagbiyahi diri sa bukid kay daghan na kaayo badlongon nila. Gani bag-o lang Sir naay milayat nga pasahero nga babaye sa gisakyan nga habal-habal kay wala ihunong sa gusto niyang kanaugan unya gihikap sa driver.”

Brgy Pit-Os, Cebu City

“Ireklamo namo ang pag-abuso sa ubang mga drivers sa habalhabal ug PUJ kay patuyang lang og parking sa ilang sakyanan, halos na lang naa sa tunga sa karsada. Naa man untay mga traffic enforcer nga gipahimutang diring dapita pero wala man sila kabadlong, unsa kahay rason?”

Brgy Poblacion, Carmen, Cebu

“Unta maatiman ning karsada namo diri, labi na sa Upper Camoning, kay ang drainage padulong sa subdivision daghan kaayo’g sagbot. Dugangan pa anang mga hinugas nga anha ra isabwag sa tunga sa karsada. Asa na man ang among mga opisyal sa barangay nga wala man kabadlong ani?”

Brgy Kawit, Medellin, Cebu

“Naa lang koy ireklamo bahin sa way ayo namo nga mga tanod sa barangay. Duna unta ko’y ipa-blotter nila nga hitabo apan gibalibaran ko kay wala kuno sila’y ballpen. Unsa, wala nay kuwarta ang barangay pagpalit og ballpen?”

* * *

Alang sa inyong mga reklamo text lang sa 09062973166