Pagsalig ug paglaum

Human sa sunod-sunod ug makalilisang nga mga kalamidad nga niigo sa nasud, ilabi na sa Kabisay-an, ang Pilipinas ug ang mga Filipino padayong nilaum ug nisandig sa bug-os nga pagsalig ngadto sa Labaw nga Makagagahum.

Mas nahatagan sa kadasig ug kalagsik ang mga Filipino nga mobarug bisan sa dagkong mga trahedya nga nisukod sa kalig-on sa iyang pagtuo ug pagsalig sa pagbisita ni Pope Francis sa Pilipinas sa niaging tuig.

Taliwa sa mga kalamidad ug kalisod, si Pope Francis nihatag og paglaum sa mga Filipino nga may mas nindot nga ugma kitang mapaabot kun mosangpit ug hingpit lang nga mosalig sa Ginoo.

Karon untang tuiga, moduaw si Pope Francis sa Pilipinas alang sa ika-51 nga International Eucharistic Congress, human sa 79 ka tuig nga unang napahigayon ang IEC dinhi sa nasud.

Apan tungod sa makaluluoy nga kahimtang sa Pilipinas human gitay-og ang Bohol, Sugbo ug ubang bahin sa Central Visayas sa 7.2 magnitude nga linog ug sa pagkusokuso sa super typhoon Yolanda sa dakong bahin sa Kabisay-an niadtong 2013, nakita sa Santo Papa ang dakong panginahanglan sa mga Filipino sa presensya sa Labaw nga Makagagahum pinaagi sa iyang pagkatawo.

Nangayo pa sa pagsabot ug pasaylo ang Santo Papa nga nalangay siya sa pag-abot aron unta mohupay sa kasub-anan nga giantos sa mga nabiktima sa katalagman.

Apan bisan kun nataud-tauran sa iyang pag-abot, wala mapawong ang mainiton nga kadasig sa mga Filipino nga naghuwat kaniya. Ang presensya ni Pope Francis ug ang iyang tam-is nga pahiyom nihatag og paglaum ug pagsalig sa mga Filipino nga may maayong ugma nga mapaabot.

Napamatud-an na usab sa Pilipinas, dili lang makausa, kon dili sa daghang mga higayon ang iyang kalig-on taliwa sa daghang mga pagsuway sama sa mga kalamidad, natural man o tinuyoan, kagubot sa politika ug uban pa.

Human sa dagkong trahedya, kinaiya na sa tawo nga mobangon, magpakalig-on ug mopahiyom. Kining maong matang sa taras usa ka de kalidad nga gasa nga angay ipaambit ilabi na ngadto sa uban nga naputong tungod sa kabug-at sa mga problemang giantos.

Ang gasa sa paghatag og paglaum sama sa gihimo ni Pope Francis dili matupngan sa bisan unsang mahalon nga butang.

Matud pa ni Cebu Auxiliary Bishop Dennis Villarojo, ang mga Filipino puno sa paglaum. Sa bisan unsang katalagman ug trahedya ang mga Filipino daling makabangon ug makabarug, butang nga maghatag og kadasig sa uban aron dili mawagtangan sa pagsalig ug paglaum.

Nunot sa pagpahigayon sa 51st International Eucharistic Congress, ikapasigarbo sa mga Sugbuanon ang pagpaambit sa gasa sa paglaum ug pagsalig ngadto sa mga delegado sa ubang kanasuran nga nakasinati usab sa daghang pagsuway.