Eukaristiya

Kini ang dugokan sa akong pangutana ni Archbishop Emeritus Ricardo Cardinal Vidal sa pagbisita nako sa iyang pinuy-anan niadtong Biyernes nunot sa pagsaulog nato karon sa International Eucharistic Congress.Wala makatambong si Cardinal Vidal sa plenary mass kauban unta ang uban pa nga mga cardinal niadtong Biyernes sa buntag didto sa Cebu Metropolitan Cathedral tungod kay aduna kini gipamati sa lawas.

Giadto nako siya sa iyang pinuy-anan diin pag-abot nako nakatulog pa intawon ang talahurong Archbishop Emeritus, apan human sa 30 minutos mibangon siya bisan pa man sa kaluya ug kalapoy sa iyang lawas tungod kay oras na diay sa pagsaulog niya sa Balaanon nga Eukaristiya diin sulod sa kapilya sa iyang balay nagmisa si Cardinal Vidal nga gitambongan sa iyang private nurse ug usa ka madre, ako ug ang akong cameraman.

Mura’g gikumot ang akong kasing-kasing nga nakasaksi ako sa dako nga gugma ni Cardinal Vidal sa Ginoo nga bisan og maglisod na siya sa pagbarug, magkurog ang mga kamot ug maghangos sa paglitok sa mga pulong, apan wala nako makita sa iyang panagway ang kakapoy, kon dili, ang langitnong kamaya nga napahigayon niya ang paghimaya sa Ginoo.

Ang akong nasaksihan mao ang naghatag kanako sa tukma nga tubag sa ako nga pangutana mahitungod sa Holy Eucharist. Dili unsa, kon dili, kinsa ang sentro sa pagsaulog sa Eukaristiya nga mao ang Lawas ug Dugo ni Hesukristo nga gidawat nato panahon sa pagpangalawat.

Unom ka tuig pa lang si Cardinal Vidal, mibiyahe siya gikan sa Marinduque paingon sa Manila alang sa una niya nga pagkalawat atol sa ika-33 nga Eucharistic Congress nga gipahigayon sa Luneta, Manila niadtong tuig 1937. Lab-as pa sa iyang panumdoman ang unang kasinatian sa iyang first communion, gani nakasag-ulo pa siya sa ilang kanta'ng kinatsila nga gipabati niya kanako.

Human sa 79 ka tuig, ang 6-anyos nga 1st communicant mao na usab ang mopakalawat karon sa 5,000 ka bata dinhi sa Sugbo atol sa 51st International Eucharistic Congress.