Dear Atty. Divine,
Nagbuwag mi sa akong bana napulo ka tuig na ang nakalabay. Ako siya nga gibiyaan human nako mahibaw-i nga may lain siyang babaye. Karon, nagtipon na sa pagpuyo ang akong bana ug ang iyang babaye ug gani iya kini nga gibalayan. Ang akong pangutana kun pananglit adunay mahitabo sa akong bana, maka-inherit ba ako sa iyang kabtangan? Ang iyang kaipon karon, duna bay katungod sa properties sa akong bana? Daghang salamat sa imong pagtagad sa akong suwat. — Lera
Dear Lera,
Kun ang inyong kaminyuon wa ma-annul sa korte, sa mata sa balaud ikaw ang legal wife ug kun adunay mahitabo sa imong bana, ikaw ug ang imong mga anak isip mga compulsory heirs maoy maka-inherit sa properties nga iyang kabilin ug dili ang iyang babaye. Kini bisan pa kun nagbuwag na kamo sa imong bana sud na sa napulo ka tuig. Ang babaye sa imong bana kun wa siya’y actual nga contribution sa pagpalit sa maong mga kabtangan, dili siya makonsiderar nga co-owner niini ug wa siya’y katungod sa properties sa imong bana. Lahi man gud ang sitwasyon sa legal wife ug sa mistress.
Sa legal wife kun dunay properties nga ma-acquire during marriage, considered ang magtiayon nga co-owners bisan pa kun way actual contribution ang kapikas. Apan sa mistress kun dunay mapalit nga properties atol sa ilang panagtipon makonsiderar lang ang partner nga co-owner kun duna siya’y actual contribution sa pagpalit sa property. Thanks and God bless! – Atty Divine
Alang sa inyong pangutana, ipadala lang sa legal corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.