EDITORYAL – Leksyon sa Sinulog 2016

Kinahanglang adunay dakong kausaban ug aksyon nga himuon ang mga organizers sa Sinulog sa sunod tuig  ug dili lang kutob sa pagpahibalo sa mga gidili ug kadtong mahimong buhaton sa mga bisita.

Apan sa dili pa nila kini buhaton, unahon una nila pagsubay kun giunsa pagkahitabo nganong adunay nahitabong kaguliyang ug gitawag pa gani sa social media og “stampede.”

Gidili man unta nga mag-inom ug pagpahigayon og street parties anang adlawa apan nganong aduna man gihapoy nahitabong ingon niini ug wala man gyud kapugngi sa mga otoridad?

Kini nga mga pangutana maoy nakapalibog sa mga tawo nianang mga orasa maong adunay nahitabong kaguliyang ug swerte na lang nga wala kaayoy daghang nasakitan.

Dili kadto maingon niadto kun sa sinugdanan pa lang wala gyuy gitugotang makasulod sa cordon samtang anaa pa ang mga contingents ug support vehicles.

Labaw pa usab nga dili kadto mahitabo kun giklaro daan kun paagian o dili ang dalan human sa parada.

Sa sunod unta nga Sinulog, di na mga kadete lang sa ROTC maoy magbantay gikan sa buntag hangtud sa hapon kay mangaluya na man ni sila niini ug di na epektibo sa ilang pagbantay.

Klaruhon ug ipatuman gyud ang giandam nga patakaran. Kinahanglang applicable sa tanan ug dili lang kun asa nagbarog ang mga nagbantay mao ray estriktuhon,

Angay usab hunahunaon sa mga organizers nga ang Sinulog makadani gyud og mga dayo nga bisita dinhi, kinahanglan silang tarungon pagtratar.

Kinahanglang masulit ang gastos sa mga debotos pag-anhi ug iapil usab kadtong mga bisita nga paglingaw-lingaw ra gyud ang tuyo kay kini makaayo man alang sa Sugbo.