Sagad sa mga nagkaatbang nga kandidato nga nagpapili sa mga elective position sa kagamhanan, magtinagdanay gihapon kun sila magkakita sa usa ka dapit, ilabi na kun adunay daghang tawo nga nagtan-aw kanila. May uban hinuon nga politiko nga nagpasuwabi gayud ang ilang kasilag ngadto sa ilang kaatbang tungod kay sa ilang paninguha nga makabig nila ang botos sa mga botante mohimo man sila og mga pasangil ngadto sa ilang mga kontra sa politika.
Apan sagad sa mga kandidato, ilabi na ang mga nagpapili sa tag-as nga katungdanan sa kagamhanan, mopakita gayud sa katawhan nga sila mohatag gihapon sa maayong pagtagad ngadto sa ilang mga kaatbang.
Subo palandungon nga adunay ubang dumadapig sa mga kandidato nga dili makahimo niining maong batasan. Daghang dumadapig nga mohimo og pagsaway sa mga tawo nga milaban sa kontra sa gilabanan nila nga kandidato.
Ang uban magtumo-tumo og mga estorya, dauton ang pagkatawo niini pinaagi sa paghimo-himo og mga walay basehanan nga pasangil. Mao kana nga kun sila magkatagbo, masi’g usa kanila dili na magtagdanay.
Ingon niini ang nahitabo sa duha ka radio blocktimers nga misuporta sa nagkaatbang nga kandidato pagka mayor sa usa ka dakbayan. Magbanus-banos sila pag-atakehay sa ilang mga programa sa radyo. Sa ilang gihimo, nahanaw na ang maayong katuyoan nga ibutyag sa publiko ang mga hiyas sa gilabanan nila nga kandidato aron magiyahan ang mga botante kun kinsa ang ilang pilion, kay sila man hinuon ang nag-away.
Sa miaging semana, nagsukmagay na unta ang duha ka radio blocktimer. Butang nga dili gayud maayo. Nagpaila lang kini sa kainit na sa politika diha sa maong siyudad. Angay nga hinumdoman sa mga dumadapig sa mga kandidato nga isyu lang maoy ipatigbabaw ug dili ang pagdaot sa kadungganan sa politiko nga inyong giisip nga kontra.