Siyam ka oras human siya nahiagom og suliyaw gikan sa pipila ka Sugbuanon ug mga bisita sa Cebu City Sports Center (CCSC) atol sa pormal nga pag-abli sa Sinulog 2016 Grand Parade, si Bise Presidente Jejomar Binay nakadawat og hinay nga pakpak gikan sa mga nanimba sa Santos nga Misa sa parokya ni San Jose sa Barangay Mabolo.
Wa siya magpahibawo nga motambong sa misa nga giduma ni Padre Joy Danao. Kinsa nakugang na lang pagkakita sa ikaduhang labing taas nga opisyal sa nasud nga niapil sa linya sa mga nangalawat. May namakpak ug way bisan usang nasuliyaw dihang gipahibawo ni Padre Danao ang pagtambong ni Binay. Di kapasanginlan ang mga Sugbuanon nga way batasan sa ilang mga bisita.
* * *
Kun mao, nganong gisuliyawan man si Binay sa CCSC? Niang pipila ka pangagpas:
Tungod sa pasidaan sa Sinulog Foundation Inc. (SFI) batok sa mga politiko sa di pagpangampanya, mahimong giisip sa mga nanambong nga sobra na nga gawas nga gipatungtong sa entablado gipadiskurso pa gyod si Binay;
Mahimong si Binay lang ang napahimungtan sa kahimangod sa mga nanambong sa taas kaayong diskurso ni suspendidong Cebu City Mayor Mike Rama kinsa gidudahang tungod sa iyang naandang pataka naglisod unsaon paghuman; o tinuod gyod tingaling namalit og gatosan ka tickets ang Liberal Party (LP) aron pagpakauwaw ni Binay.
* * *
Bisan nagtuyuk-tuyok ang diskurso, wa na hisguti ni Rama ang iyang pagkasuspenso. Nga maoy unod sa tanan niyang pakigpung ug media interviews sukad sa pagkasuspenso sa niaging buwan. Apan nakalimot nga nakaangkon sa pribilehiyo pag-abli sa Sinulog isip chairman sa SFI.
Gipailang Rama ang iyang kaugalingon nga “Cebu City Mayor” ug ang Acting Mayor nga “Atty. Edgar Labella.” Sa kreditong Rama, wa siya mokanta (nahawongan tingali sa mas nindot nga kantang “On the Wings of Love” ni Padre Jonas Mejares atol sa gisundang misa). Apan mora siyang second-rate, trying hard copycat sa boxing announcer nga si Michael Buffer.
* * *
Klarong nagpa-goryo-goryo silang Rama ug Binay nga wa kadungog sa suliyaw sa katawhan. Isip mga politiko, di sila mabasol kun maminaw lang sa mga ganahan nilang madunggan ug motan-aw lang sa mga ganahan nilang makit-an. Apan kinahanglan sang may mohunghong nila sa sukwahi nga kamatuoran:
Mahimong numero uno na si Binay sa Kabisay-an ug Pilipinas, apan human napilde sa Sugbo pagka bise presidente niadtong 2010 wa gyud siyang kaugpo dinhi maong gilikayan na sa mga Garcia ug mahimo ganing makaduhig ni Rama; ug
Mahimong makalingaw sa mga dumadapig ni Rama ang way kinutoban niyang mga pakigpung ug pagpaluuy-luoy bisan siya mismo niinsistir nga di silot ang duha ka buwan nga preventive suspension, apan may kinutoban ang pailob sa mga Sugbuanon sa iyang mga salida.