Nognog

May positibo ba nga epekto sa political career ni bise-presidente Jejomar Binay ang political advertisement nga "Nognog?"

Sa maong pol ad, gipakita ang usa ka tinamay nga si Binay kinsa itom ug potot nga gipasanginlang kurakot ug kawatan.  Apan ang maong "Nognog" naghatag og libreng edukasyon, maayong serbisyo sa panglawas sa taga Makati City, nipangga sa mga senior citizen ug action driven.

Sa labing uwahing survey sa Businessworld-Social Weather Stations niadtong Enero 8-10 ning tuiga, nisulbong ang popularidad ni Binay. Siya na'y nag-una uban sa 31 porsiyento gikan sa 1,200 ka respondents nga mopili kaniya kun mag-eleksyon karong adlawa.

Iyang sikit nga kaatbang nga si Senador Grace Poe dako na og pag-us-os. Kun sa survey kaniadtong Disyembre sa niaging tuig nagtabla sila ni Poe sa 26 porsiyento karon, nilabaw na si Binay og 7 porsiyento.

May 24 porsiyento na lang si Poe sa uwahing survey. Nikunhod og dos porsiyento ang iyang ratings. Hinoon sukad pa sa unang mga survey nga wala mangiwit ug wala mabiyai og dako ang bise-presidente. Kun molabaw man kaniya si Senador Grace Poe gamay ra.

Ang popularidad ni VP Binay sukad sa iyang pagdaog niadtong 2010 ug hangtod karon wala matandog bisan sa daghang pasangil sa pangurakot ug anomaliya sa mga proyekto samtang siya pa ang mayor sa Makati City,  hangtod na sa isyu sa political dynasty.

Unsay sekreto ni Binay ngano nga wala molukapa ang iyang popularidad taliwa sa daghang kontrobersiya? Ania ang pipila sa mga rason:

Una, nakagamot na ang mass-based ni Binay ug wala kini niya pasagdi. Sa tanang magpapili sa pagka-presidente, si Binay ra ang consistent sa iyang pagduaw bisan sa labing suok nga mga lungsod ug mga isla. Mahinumdoman lang ang maong mga dapit kun duol na ang eleksyon.

Apan si Binay naka-establisar na og sister Makati relationship tali sa mga lungsod ug dakbayan.  Magpadala og multi-cabs nga nakapatik ang iyang ngalan ug dagway.

Siya mismo ang motunol sa t-shirts nga ipanghatag. Makig-boodle fight, makiglamano ug makig-estorya sa mga senior citizen. Sa Sugbo lang makadaghan na si Binay nga nagbalik-balik.

Kini ang nakabentaha kang Binay tali sa ubang presidential aspirants. Iyang nakuha ang simpatiya sa mga botante. Garbo sa usa ka botante nga tagdon ug hatagan og bili sa usa ka politiko.

Si Binay tang-an na sa pamolitika ug may napakita usab nga agi didto sa Makati. Gawas sa Makati nakaabot na usab ang iyang tabang sa ubang bahin sa nasud.

Kini maoy nagpalig-on kaniya ug dili dali matay-og  bisan sa mga kontrobersiya nga iyang giatubang.