Pamilya durugista!

Ang pamilya ang labing lig-on nga pundasyon sa pag-umol sa pagkatawo sa matag miyembro niini, diin ang amahan mao ang haligi, ug ang inahan usab mao ang suga. Apan unsa man ang mahitabo kun ang haligi gikaon sa anay ug ang suga napunder na gumikan sa dautan nga bisyo?  Sigurado nga mahugno ang tanan nga nagpuyo sa naasoy nga pinuy-anan ug magpuyo sila sa ngitngit nga binuhatan.

Ingon niini ang nahitabo sa usa ka pamilyahan nga nasikop sa mga sakop sa PNP Provincial Intelligence Branch didto sa Camotes kaniadtong nakalabay nga semana. Nakuhaan sila og mga pinutos nga shabu nga nagkantidad og duha ka milyon ka pesos ug mga tag-as nga kalibre sa pusil.

Ang inahan nga usa ka magtutudlo, nga mao unta ang bugtong makaluwas dili lang sa ilang padre de pamilya, kon dili, lakip na sa ilang mga anak gikan sa pagka gumon sa bisyo, nagpadala man sa tinagingting sa dali nga kwarta ug nagpaanod na sa ilegal nga negosyo. Dili na ikapangutana pa ngano nga nahitumpawak ang ilang mga anak tungod kay ang ilang mga numero uno nga idolo, mao man ang nag- ulo sa tinonto. May panultihon nga kun unsa ang punoan, mao usab ang bunga. Wala na gyud diay pili karon ang bisyo tungod kay apil naman ang mga tawo nga gilauman unta nga ehemplo ug sumbanan sa katarong nalambigit na man sa binuang, sama ning magtutudlo nga crucial kaayo ang papel sa pag-umol sa kinaadman ug pamatasan sa mga tinun-an.

Hinoon pipila lang ni sila nga naghugaw-hugaw sa imahen sa gihuptan nila nga profession. Sama sa uban nga organisasyon, naa man gani sa PNP nga maoy tigpatuman sa balaod.

Usa ka lola nasikop sa Duljo-Fatima sa pagpahuyot og shabu aron kuno masuportahan niya ang iyang mga apo. Sa iyang wali, usa ka pari nagkanayon nga ania na ang hari sa kangitngit nga miganoy sa mga tawo sa pagkasala, ilabi na kadtong mga huyang sa pagtoo sa Dios.

Dili nalang unya kita mahibulong nga usa ka adlaw may suloguon sa simbahan nga mahilambigit niini nga tinonto. Pastilan makapanglimbawot sa balhibo!