EDITORYAL – Respetaray lang

Karong adlawa maghudyaka ang Sugbo ilabi na ang Dakbayan sa Sugbo tungod sa selebrasyon sa kapistahan sa Senyor Sto. Niño ug ang pagpahigayon na sa Sinulog Grand Parade 2016.

Usa ka dakong hagit karon sa mga organizers kining pagdili sa pagpahigayon og mga street parties diha sa carousel route.

Siguro mahimo nila kini sa maong dapit, apan unsaon na man lang kanang distansya gikan sa rota?

Kini ra bang ubang kabataan anha mogara-gara ug mohagit sa mga otoridad kun kargado na sa kahubog.

Ang mga organizers nagdili sa mga ilimnong makahubog, binotelyang ilimnon, armas, kutsilyo, ug uban pang ilegal nga mga butang.

Maayong ang mga establisamento duol sa rota maoy mangulo sa pagtuman niining mga gidili.

Kadtong dili mahiligon sa mga parties, mas maayong molikay na lang sa mga lugar nga adunay gipahigayong street parties.

Hinumdoman unta sa mga kabataan nga dili lang kini maoy kalingawan nga ilang matagamtaman sa tibuok nilang kinabuhi.

Mas maayong likayan nila ang paghimo og kasamok ilabi na kun sila nakainom kay di matagna ang disgrasya sa prisohan unya ang ilang punta.

Hinay-hinay lang ang pagkiat-kiat sa mga parties aron wala’y kasamok nga mahitabo ug molahutay hangtud sa oras sa tingpauli nga luwas ang tanan.

Adunay panahon sa paglingaw-lingaw ug aduna say para sa pag-ampo. Likayan lang gyud nga di masagolan og pagkawalay respetar sa uban aron di  masamok.

Di unta kalimtan nga kining adlawa balaan alang sa mga deboto kay dili lang kini adlaw sa paglingaw-lingaw kondili hasta sa pag-ampo ug pagpasalamat ngadto sa Balaang Bata.