Masaksihan na usab ugma ang labing mabulokong kalihukan nga mao ang Sinulog Grand Parade 2016 nga gipahaum atol sa kapistahan ni Senyor Santo Niño.
Magpanon gyud ang mga tawo pag-adto sa Basilica aron pagtambong sa pontifical mass nga pasiugdahan sa atong halangdong Arsobispo sa Sugbo, Jose Palma.
Dayon, daghan ang moderitso na lang pagtan-aw sa nindot nga mga pasundayag diha sa kadalanan, ilabi na sa halapad nga intablado sa Cebu City Sports Center.
Sadya kaayo ang pamilya nga mag-iyaiya lang pagpanuroy ug labing siguro, biyaan lang ang ilang panimalay nga walay tawo.
Aron masiguro nga luwas sa sunog ang inyong panimalay, sa dili pa kamo mobiya, siguroa pag-ibot ang tanang electrical appliances nga wala gigamit.
Kun mahimo gani, i-off na lang ang plangka aron hingpit gyud nga makasiguro nga luwas ang inyong panimalay sa sunog nga mugna sa kuryente.
I-off usab ang LPG regulator. Kun may bisan gamay nga hungaw sa hose, ilisi gyud dayon kay delikado na. Dali ra ang pagsuta kun may hungaw ba.
Magkuha ka lang og panapton, foam o gamit nato sa paghugas sa plato, sabonan ug pabola-on, dayon ipahid kini gikan sa regulator, sa hose ug hangtod didto sa koneksyon sa atong stove.
Kun makakita kamo ug magbolabola, timailhan kini nga adunay hungaw. Ayaw ninyo ibutang sa peligro ang mga kinabuhi sa tanang miyembro sa panimalay tungod lang sa imong pagkainot.
Atol niining kalihukan sa Sinulog, alerto ang tanang sakop sa Bureau of Fire Protection. Ugma, ang mga firetrucks ipakatap daan sa lainlaing dapit aron makaresponde dayon kun may sunog. Viva Pit Senyor!