EDITORYAL - Paghukom nga wa sa lugar

Klaruhon unta og maayo sa mga organizers kun unsay gipasabot sa estorya nga gidid-an ang mga politikong kandidato sa 2016 Elections nga makasakay sa mga floats o mokuyog sa mga contingents sa Sinulog Grand Parade.

Nahimo na man gud nga dautan sa panan-aw sa mga tawo kun adunay mga sama kanila nga ilang makitang motambong sa ingon niini nga mga kalihokan.

Apan dili kini husto ug di angay ikalain sa uban.  Basin ang tuyo aning mga politiko pagtambong o pagsaksi sa selebrasyon kabahin sa ilang panaad o pangaliya ngadto sa Balaang Bata alang sa ilang espirituwal nga panginahanglan.

Ang Senyor Sto. Niño di man siguro maghinakog sa iyang grasya ni bisan kinsa nga mangaliya kaniya, ang tawo pa kaha?

Kinsa man gud ang nagpasiugda niini nga mura og dako na kaayong krimen kun ang politiko o kandidato motambong sa mga relihiyosong kalihokan?

Di ba kaha ni gipasiugdahan lang sa ilang mga kaatbang nga nasuya kay tapuk-an sa mga tawo ilang kontra unya sila gilangaw lang?

Dautan ba diay ang kandidato kun pananglitan tagdon ang mga tawong motimbaya, mokawaykaway, molamano ug magpakuha og "selfies" o "groupies?"

Wa man pud siguroy hungog nga politiko ang mosuroy sa bagang duot sa mga tawo atol sa Sinulog aron manglamano ug magpaila sa iyang kaugalingon nga mokandidato siya sa eleksyon.

Ang paghukom kun nangampanya o nagpaila ang kandidato sa mga tawo mag-agad kini sa pagtan-aw sa indibidwal.

Apan di makiangayon nga hukman dayon sila tungod lang kay nasigpatan siyang nitambong sa selebrasyon. Niining pagka-sensitibo sa publiko, angay lamang gyud hinuon nga magmatngon ug magbaton og delicadeza ang mga kandidato kay mabati unya sila sa panan-aw sa katawhan.