Kinsay alkanse?

Dili usab diay palupig ang administrasyon sa University of the Philippines Cebu. Tinguha gayud niini nga mabawi ang luna sa sitio Avocado, Barangay Lahug ning dakbayan sa Sugbo nga giukopar sa pipila ka pamilya kansang kabalayan ang nasunog sa niaging bulan.

Kaniadtong Lunes, naka-score ang UP Cebu sa dihang mipagawas ang korte og usa ka temporary restraining order ngadto sa kagamhanan sa dakbayan nga nagdili niini sa pag-reblock sa nasunog nga luna.  

Hinuon ulahi na ang tanan. Kini tungod kay human na ang re-blocking sa kagamhanan sa siyudad. Apan bisan pa man niini, maisip gayud nga kadaugan sa administrasyon sa maong tunghaan ang TRO sa korte.

Karon, adunay laing kaso nga gipasaka ang UP Cebu. Niining panahona batok na usab niadtong mga nasunogan nga giakusahan sa maong tunghaan og forcible entry tungod sa ilang pag-okupar pag-usab sa maong lote.

Niining maong kaguliyang karon, mura’g alkanse gayud ang mga informal settlers. Kini sa rason nga ilegal ang ilang pag-okupar sa maong lote. Bisan unsang orasa mahimo kining bawion sa legal nga tag-iya nga mao ang UP Cebu.

Mao nang wala gayuy dag-anan ang maong mga molupyo. Bisan pa kun motabang pa nila ang kagamhanan sa dakbayan, dili gayud mopabor ang balaud kanila. Kun ako pa nila, dili na lamang ko magpaugat sa pagpabilin pa sa maong luna.

Ang problema mao nga walay puas ang City Hall pagpugos sa mga molupyo pagpabalik sa maong luna. Lisod kini nga sabton. Tungod niini, morag nahukasan na hinuon sa katungod ang tinud-anay nga tag-iya paggamit sa maong luna.

Sama lamang nga gipalaum sa mga opisyal sa dakbayan ang mga biktima sa sunog nga walay makababag kanila kun mobalik sila sa maong luna. Apan, mao lagi, wala usab magpapire ang administrasyon sa UP Cebu. Ug kinsa ang maalaut niini? Klaro nga kadtong mga molupyo.   

Kun gusto gayud ang lokal nga kagamhanan pagtabang sa mga nasunogan sa sitio Avocado ug sa tanang informal setters ning dakbayan, nganong dili na man lamang kini mogahin og permanenteng relocation site?