Unsa may kapuslanan sa balaod kun wala kini suporta gikan mismo sa mga magbabalaod nga maoy nipanday ug niaprubar niini?
Ning bag-ohay lang, wala hatagi og pundo sa Kongreso ang kontrobersyal kaayong Reproductive Health Law, ang maong balaod gikombatihan og maayo sa mga magbalalaod sud sa pipila ka tuig.
Apan karong napasar na, walay pundo nga ikagahin para sa pagpamalit og kontraseptibo alang sa kababayen-an.
Unsa may pulos ani nga balaora nga wala may pundo? Matud pang Sen. Miriam Defensor-Santiago immoral ang gihimo sa kongreso sa wa pagbutang og pundo niini.
Ang pundo sa RH Law gikuhaan og P1-billion nga matud pang Santiago dako na og matabang sa 7 milyones ka mga kababayen-an alang sa ilang reproductive health.
Matud pang Santiago, 200 matag 100 mil ka mga inahan ang mamatay tungod sa komplikasyon sa ilang pagmabdos ug pagpanganak.
Tinuod nagkinahanglan og pundo ang Department of National Defense ilabi na gihingusgan sa administrasyong Aquino ang modernisasyon niini tungod sa mga hulga sa sulod ug sa gawas sa nasud.
Di rason nga ang pundo gigamit alang sa DND tungod kay mahimo mang adto mokuha sa ubang departamento nga wa magkinahanglan og dinaliang pundo.