Sipyat sa siguridad

Ordinaryo na ang mga pangpangawat sulod sa mga hospital dinhi sa dakbayan sa Sugbo. Sukad pa sa una, daghan nang nasulat sa police blotter mahitungod sa mga butang sa mga pasyente ug mga bisita nga nawala sulod sa mga tambalanan, pribado man o pang publiko.

Tungod usahay sa luag nga siguridad, dili gayud malikayan nga mahitabo ang mga pagpangawat sulod sa mga hospital. Dali ra nga makasulod ang mga kawatan, kinsa kasagaran nga magpakaaron ingnon nga mga trabahante o bisita sa mga pasyente.

Karon, dili na lamang butang maoy punterya sa mga kawatan. Sa niaging mga adlaw, nakurat tang tanan sa dihang usa ka bag-o nga natawo ang gikawat gikan sa Vicente Sotto Memorial Medical Center.  Usa ka babaye ang nagpakaaron-ingnon nga medical worker sa maong tambalanan ang nakuhaan og footage sa CCTV nga dala ang maong bata. Yano lamang nga naglakaw ang maong babaye, kinsa nag-uniporme sama sa usa ka nurse, pagawas sa VSMMC.

Maayo na lamang kay nadakpan sa otoridad ang maong babaye pagka-ugma didto sa Barangay Lahug. Kudos ngadto sa kapolisan tungod kay abtik sila nga nakasuhid sa dakbayan ug kasilinganang lugar human sa maong insidente.

Klaro nga adunay lapso ang maong hospital sa maong insidente. Ilabina sa aspeto sa siguridad. Kini tungod kay sayon lamang nga nakasulod ang maong babaye nga wala mabantayi bisan pa man sa nagkatap nga mga guwardiya.

Dili ikalimod nga adunay dakong tulobagon ang VSMMC ngano nga nakalusot kadtong maong babaye. Siguro nagdahom ang mga guwardiya nga trabahante kini sa maong hospital tungod lagi kay nagsul-ob man og uniporme sa usa ka medical worker. Hinuon naila na ang VSMMC isip grabe ka estrikto sa pagpasulod og mga bisita. Nalatid kini sa palisiya niini. Gani, mismo ang mga sakop sa media maglisod gayud pagsulod sa maong tambalanan alang sa pagkuha og mga balita.

Apan tungod sa maong insidente, angay nga lahugayon sa VSMMC ug sa tanang hospital sa Sugbo ang ilang palisiya. Hinaut nga magsilbi kadto nga dakong pahinumdom sa grabe nga sipyat sa siguridad.