Pagpakabana yawe sa kasulbaran sa kaso

Kun manginlabot lang diay ang tanan ug magtinabangay, dali ra gyud masulbad ang problema sa atong katilingban, sama sa nahitabo nga pagdagit sa usa ka bata nga bag-o lang gihimugso sa iyang inahan sulod sa Vicente Sotto Memorial Medical Center.

Naluwas ang masuso ug nasikop dayon sa mga sakop sa PNP Criminal Investigation Group (CIDG)-7 si Melissa Londres, ang suspek sa kidnapping ug ang iyang karelasyon nga si Philip Winfred Almeria.

Ang yawe sa kalampusan pagsulbad sa krimen mao ang pagpakabana sa komunidad diin nahimo nga tulay ang media nga naglakip sa radyo, pamantalaan ug telebisyon ug apil na ang social media diin aktibo na kaayo ang mga netizens pag-report sa mga kasikas nga nasagap nila sa ilang palibot.

Samtang naputos na usab sa pagsaway ang VSMMC gumikan sa nahitabo diin gidakdakan sila sa mga pagbasol nga sayon ra nga nalutsan sa suspek bisan pa man sa hilabihan ka estrikto sa ilang patakaran.

Dili na lang ko moapil nga motulisok sa tambalanan sanglit dili man nila kagustohan ang nahitabo. Duna sila’y gisubay nga protocol sa ilang seguridad apan ang problema kay nagmika ang ilang mga gwardiya niadtong panahona hinungdan nga nalutsan sa babaye nga kidnapper.

Dali kaayo nga nakig-alayon ang tagdumala sa VSMMC ngadto sa mga otoridad ug sa media nga maoy misabwag sa kasayuran kalabot sa nahitabo nga nakapatukmod sa paglihok sa mga tawo aron masulbad ang kaso.

Dinhi nato makita nga makatabang ug malauman usab diay ang media panahon sa panginahanglan. Nagmatuod lang usab kini nga ang media dili kontrabida, kon dili, partner sa pagpakaylap sa kasayuran sa atong katilingban. Pahalipayan nato ang mga otoridad (CIDG7), VSMMC ug ang mga tawo nga nagpakabana nga misangpot sa dali nga pagkasulbad sa kaso.

Unta, makorehean usab dayon sa tambalanan ang ilang mga sipyat. Labaw sa tanan, unta dili na kaayo sila allergic sa media!