Daghang salamat

Kaniadtong Enero 3 ning tuiga, tangkod gyud nga 11 ka tuig na ko sa DySS Super Radyo-Cebu ug ning maong pamantalaan Banat News isip maglilindog, kun wala ko masayop.

Maong dako kaayo ang akong pasalamat nga miabot ko ning maong gidugayon sa sibyaanan ug ning maong pamantalaan.

Sulod sa 11 ka tuig, ang akong programa makadaghan na nga nahimong numero uno sa tanang mga programa sa radyo sa Sugbo nga anaa sa susamang program slots.

Sa miaging tuig, napili kini nga best public affairs program for radio category sa Cebu Archdiocesan Mass Media Awards (CAMMA)-2015.

Kining tanan dili nako makab-ot kun wala pa ang inyong padayong pagpaminaw sa akong programa o tulumanon sa radyo matag alas 5:00 - 6:00 sa buntag ug alas 6:30 - 9:00 sa matag gabii.

Dili pud seguro ko moabot ning maong gidugayon sa Banat News kun wala pa usab mo mobasa ning akong lindog matag Martes ug Huwebes.

Mao nga dako gyud kaayo ang akong pagpasalamat kaninyong tanan nga naminaw sa akong tulumanon sa radyo ug mibasa sa akong lindog sa Banat News.

Akong lauman nga niining Bag-ong Tuig, madugangan pa unta ang akong kadasig sa pagpangalagad kaninyo pinaagi sa pagpaambit sa akong mga panahom sa pamasin nga makahatag kini kaninyo og ideya aron makaporma usab kamo sa inyong mga bulawanong hunahuna.

Usbon ko daghang salamat kaninyong tanan ug maayong Bag-ong Tuig!