EDITORYAL – Salawayong enforcers

Migasto ang nasudnong kagamhanan og kapin sa P4 milyones sa pagpatukod og mga skywalk, ilabi na sa mga dapit nga busy kaayo sa mga sakyanan, aron dili mameligro ang mga tawo nga molabang ug aron dili mabalda ang dagan sa mga motorista.

Apan nabantayan nga daghan gihapon ang molabang lang sa karsada ug dili adto moagi sa skywalk. Mao gani kini ang rason ngano nga ang usa ka magtutudlo sa Banilad Elementary School nadam-agan sa sakyanan sa City Hall nga giisyu ngadto sa usa ka konsehal.

Wala matudloi og leksyon ang katawhan tungod kay ang gitahasan sa pagpatuman sa balaod manghinan-aw ra man bisan og makakita sila sa mga malapason nga molabang sa karsada.

Kagahapon, naaktohan ni The Freeman Reporter Bryner Diaz ang mga tawo nga milabang lang sa karsada ilawom sa skywalk duol sa Robinsons-Fuente Osmeña ug gitan-aw ra kini sa duha ka traffic enforcer nga nagsultihanay sa daplin sa karsada.

Kun gihimo pa sa mga traffic enforcers ang ilang katungdanan ug gibadlong kadtong mga tawo nga milabang sa karsada, ang maong mga tawo matudloan unta og leksyon.

Ang “Off and On” nga pagpatuman sa balaod maoy usa sa hinungdan nga ang ubang tawo madakpan na hinuon. Adunay magtuo nga wala na idili ang Jaywalking, kon pagtabok sa karsada nga dili subay sa pedestrian lanes ug bisan “Go” pa ang traffic signal.

Angay nga imbestigahon sa kadagkoan sa Cebu City Transportation Office (CCTO) ang duha ka traffic enforcers nga nagkalingaw lang og sultihanay daplin sa karsada ug nagpabaya sa ilang trabaho.