Pagkamakanunayon

Nalipay siya tungod sa mapahiyumong saad sa iyang labaw nga bisan unsay mahitabo siya tabangan niini, motuman lang siya sa gisugo niya nga iyang gitahud. Tuod man, nagmatinumanon siya ug nahimong nagkamakanunayon sa pagtuman sa mga sugo niini. Apan sa kalit lang nahimong daw hanap pa sa diyes panas ang tanan. Ang mapahiyumong pasalig ni Boss nagpabiling pasalig nga way katumanan lamang. Ang iyang labaw di makasabot niya tungod kay kini walay igong personal touch ngadto kanila nga iyang mga sakop.

Daw mga sulugoon lamang sila aron mahatagan og katumanan ang kinaugalingong tumong niini sa pagpasikat ug pagpagarbo bisan pa man kun kini nagkahulogan og pagsakripisyo nila nga mga timawa.

Ang mahinungdanon masapupo niini ang tanang pagdayeg ug pasidungog. Ang hagit mao ning panahon sa kausaban magpabilin kang makanunayon dili tungod sa imong pangulo o ni bisan kinsa nga giisip mong labaw. Hinunoa, imong hinumdoman nga magmakanunayon ka kay ang tanan nimong gibuhat mosalamin sa matang sa pagkatawo nga mao ikaw…